Marka 16:6.

 Judate chawlhni a lo ral a Pathian ni, zing takah hmeichhe pathumte chu rimtui hnawih tur kengin an kal a. Thlan an han thlen chuan thlan chu inhawng sain an hmu a, mak an ti hle a ni. Thlan chhung an han luh chuan tlangval puan var sin ang maiin vantirhkoh chu a ding lama lo thu an hmu a, an mangang hle mai a. Vantirhkoh chuan mangang lo tur leh, a thawhleh tawh thu a lo hrilh hlawm a ni.

He vantirhkoh hi Isua, khawvela mihringa a lo pian zana Bethlehem daia rawn thlahtute zing ami bawk kha a ni ngei ang. Kum 33 lai mai chhandamna hna thawka khawvela awm kha van taksaa a thawh leh meuh chuan van miten rawn hmuakin a rawn kai tho leh ta a ni. Vana lawn nghal mai lovin, a tho leh ngei a ni tih khawvel mihringten kan hriat theih nan ni sawmli lai a zirtirte hnenah a inlar thin a ni.

Pathian fapa sualna reng nei lo chu mihring sual fate chhandam nan mihringah a lo awm a. A mihringpuite chu krosah rawn thihpuiin Pathian fa atan thlan atangin ama rualin min kaitho leh ta a ni. (Rom6:4,5,6) “Mi zawng zawng thih aiin mi pakhat a thi a, chuvangin mi zawng zawng chu an thi a ni.” min ti a.(IIKor 5:14,15)” Thihna ata a tho leh a ni tih ringtu zawng zawngte chu Mi nungah min lo chhiar ve ta a. Tichuan, taksaa kan la nun reng chhung hian a thawhlehna ringtute chu ama ruala nung veah min ruat ta a ni.

Isua Krista vawi khat thawhlehna hian ringtute tan chuan thawhlehna vawi hnih kan neih phah a ni. A pakhatna chu Adama avanga kan thlarau thihna kha a taksa ngeiin,a langa hriattir nan a lo thi a. Chu chu Pathianin mi zawng zawng thihnaah min pawmsak ta a. Chu chu a ring apiangte tan chuan nunna a lo ni ta a. Tuna kan tisa taksa put lai reng hian a thawh leh ruala tho veah Pathianin min ngai ta a. Chu chu kan thawhlehna vawi khatna a ni. Chutianga Amah avanga tho leh fa kan ni tih inhre tawhte pawh hi kan taksa vaivuta siam hi a la thi leh dawn tho va. Chu kan taksa vaivuta chang leh tura pawh chu ni kin niah ama thawh leh angin kan tho leh ngei dawn tih, a takin a thawhlehna hian min hriattir bawk a ni. Thawhlehna hmasa zawk hre chiang tawhtute tan chuan kan taksa thihna chu thihnaah an ngai tawh lo va, muhil ang chauhvin an ngai tawh a ni.

Hei hi a ni ang a... “Thawhlehna hmasaa telte chu an eng a thawl e,” a tih kha ni ang a....! (Krista ruala nung/tho kan ni tih inhriate chu kan dam chhung pawhin kan engthawl em hi) Lal Isua thawhlehna hi ringtute tan a va han pawimawh tak em...! Tho leh tawh lovin vanah tuma hriat lohvin min lo lawnsan daih mai se chuan, kan Rinna hian awmzia a nei lovang. Sakhaw dang zuitute aiin engmah chungnunna pawh kan nei lo vang. Anni ho Zui Pathian chu an thi a tumah an tho leh tawh lo. A lo pianna hi mipa tel lova Thlarau Thianghlima paitir, thilmak, khawvel mite hriat thiam loh a ni ang bawkin mitthi zing ata a thawh lehna pawh hi thilmak, khawvel mite tan chuan hriatthiam rual a ni lo. Mahse, keini amah ringtute erawh hi chu Thlarau Thianghlim hriattirnain chu chu kan hria a kan nunpui ta a nih hi, Lalpa chu fakin awm rawh se.

Kan thih ai min thihsaktu hian keini nungdama la awmte a nun aia nung (ama tana nung) ve turin min bat a, chumi avang chuan a ni kan thih aiin a lo thih ni! Buhfang pakhat Lal Isua chu leia tuha awmin a thi ta a. Chumi atang chuan tam takah a lo pung ta a, a tisa taksa kha ni lovin, A Thlarau zawkin ringtu zawng zawng chhungah a awm ta a. Krista rilru pua mitthi zing ata a thawhlehna thu khawvel hriattir ve turin min duh a nih hi. Mitthi zing ata tholeh Krista hmel hi kan nun theuhvah i lantir ang u le.

Thlarau bo, krista hming la hre ngai lote hmangaih vang ni lo pawhin Krista kan hmangaih avang zawkin a thawhlehna hriatpuitu tur mi pakhat tal hruai ve turin Tholeh Kristan a beisei a che. [31/03, 10:12 pm] Isaac Ktp: Tirhkoh Paulan “Krista ruala khenbehin ka awm ve a, mahse, ka nung a ni. Keimah tak kha chu ni tawh lovin, Krista chu a Thlarauvin keimahah hian a nung ta zawk a ni, a ti.

Chuvangin hmun dangah” Nun hi Krista a ni, “ a ti bawk. A awmzia ber chu Isua Krista hmel hi tuna mite hian tumahin kan hmu lo va, film changtuten Isua lema chang tura an thlan hmel kha emaw Isua hmel kan ti mai thin a. Ama hmel tak chu a ni si lo. A hmel va an kher kha min phut lo va, a nungchang , ama zuitute nun dan tur, hmangaihna hmel te, lainatna inngaihtlawmna leh thuhnuairawlna thinlung pu turin min duh. Min beisei ang tak hian mi zawng zawng hi han awm thei tehreng ila chuan leiah hian Vannun kan hmang mai dawn a lo ni. “In inhmangaih tawn hian miin ka zirtirte in ni tih an hre thei ang, “inhmangaihna hi Isua hmel anna ber chu a ni.”

Kohhrana baptisma chang tawh apiangte chuan thawhlehna hmasaa tho leh leh tawh kan ni tih entir nan Pa leh Fapa leh Thlarau Thianghlim hmingin baptisma kan chan tawh kha. Kha kha Thlarauva kan thawhlehna chu a ni. Pathian mithmuhin tholeh fa, ama fa duh takte kan ni tih inhriain ama lawmzawngin nitin i nung ang u.