“Nang Jakob changpat leh Israel mite u, hlau suh u ka tanpui ang che u, Lalpan a ti. Nangmahni tlantu che u chu Israel -ho mithianghlim chu a ni” Awle, helai Pathian thu Israel te Babulon sala an tan laia Pathian inpuanchhuahna hi i lo zir teh ang u. Pathian lehkhabu Genesis atanga Thupuan thleng kan en chuan ringtute hlauhna bawihah kan tang ang tih hi min hlauh pui êm êm a, chuvangin kan bible ah hian ‘hlau suh’ tih hi vawi 365 lai a lo lang a ni tih hi Bible chhuitute chuan an lo sawi a ni. 


    Chuti a nih chuan Pathian hian hlau suh nitin hian min lo ti chamchi reng mai a lo ni. Tuna kan Bible chang rawn tarlan hi Israel saltangte hnena Pathian thlamuanna thu, zawlnei Isaia hmanga lo thleng a ni. 


    Awle, he thu Israel mite saltang chaklo tak leh nep tak chuan changpat ang mai a rah beha rahsawm theih dinhmuna an din lai chuan beisei tur an van nei tlem dawn êm. Changpat chu kan hriat theuh angin nungcha zinga nep ber leh tihnat leh tihchhiat awlsam berte zing a mi a ni. 


    Chutiang dinhmunah chuan Jakoba (Israel mite) chu Pathianin a dah a ni. Changpat ang leka chak lo, chau leh dimdawi ngai an ni. Israel mite chuan an chheh vela hnam leh sawrkar lian, ropui leh chak kut an tuar fo rêng a ni. Hetih lai hian Israel mite chu Babulon salah an tang a, anmahni chuan an dingchhuak zo dawn lo changpat ang maia rahsawm mai chu an hmabâk a ni. 


    An chauvin an zam hle niawm tak a ni, nimahsela an hnena Lalpa thu lo thleng chu a va mak êm! “Nang Jakob, changpât leh Israel mite u, hlau suh u ka tanpui ang che u,” Lalpa’n a ti. Rin ngam a va har dawnin a thlamuanthlakin, a va lawmawm dawn si êm! An thudawnna hi Israel ho mithianghlim, thiltitheitak a nih avangin a rintlâk êm êm a ni. Lalpa chuan Israel ho chu a thutiam ang ngeiin a tanpuiin a chhanchhuak ta ngei mai le, a va lawmawm dawn tak êm! 


    An saltang chhuak lawm zia chu Sam ziaktuin hetiang hian a lo ziak rêng a ni, “Lalpan Zion salte a hruaikir leh lai khan mumanga mangtute ang mai kan ni a, chumi lai chuan kan kâ chu nuihin a khata, kan lei chu hlasakin: Chumi lai chuan hnamtin zingah Lalpa chuan thil ropui takte a tih sak a ni an ti a” Saltangte engmah tithei tawh lo changpat ang mai leh hmusitawm tak kha Lalpa’n thiltitheitak ah leh chak takah siam a tum a nih chu, a va ropui êm!. 


    Chutiang bawk chuan tunlaia ringtute nang leh kei pawh hi Setana sala tang, Setana’n hmusit taka min rahhrual mai mai thin kan ni a, chuta tang chuan thu mai ni lovin a fapa thiltihtheihna hmangin Pathian nen kan in mihranna lak ata hmangaihna famkimin min chhandam ta. Lalpa chu fakin awm rawh se! Chuvangin, enganga harsatna leh manganna hnuaiah pawh chak lo tak leh zam taka kan awm pawhin tanpuitu leh chhanchhuaktu kan mamawh thin. Chutichuan Israel ten Pathian an au angin keini pawhin Pathian au ila min lo chhanchhuak zel dawn zuk nia!!