Ama anpuia siam mihringte hnenah chuan a hmangaihna chu chin lem nei lovin a luangliam zawih zawih a. Suala an tluk hnu tlanchhuah leh nana a insen ral raihna nun chu mihring tawngte hian an hrilhfiah zo mawlh lo. Pu Gandhi-a te, Aung San Suu Kyi te, Nelson Mandela te leh zalennna sualtu dang ten an ram leh hnam hmangaih avanga an mihring puite tana an luan ral raihna te hi a va ropuiin a va mawi tehlul em. He ze ropui HMANGAIHNA hi a mawiin, pawi a va sawilo teh lul em!!! Nimahsela kan pathian HMANGAIHNA nen chuan tehkhin rual a ni lo.

Tirhkoh Pawla khan he HMANGAIHNA mawizia, duhawmzia leh hlutzia hi a va hmuchiang teh lul em! ‘Thu hrilh theihna neiin, thuruk zawng zawng leh hriatna zawng zawng hre vek mah ila, tlang sawn theihna khawp hial rinna famkim nei mah ila, HMANGAIHNA ka neih si loh chuan engmah ka ni lovang’ tiin a sawi tawl mai a nih chu. Tin, heng thil pathum – Rinna, beiseina leh hmangaihna te zingah hian HMANGAIHNA chu a dah chungnung lawr lak a ni.

Ngaihtuah zui ngai ta chu hei hi a ni. Pa Pathian HMANGAIHNA chu keini a tlan chhuahte tan chuan thilthlawn pek a lo ni a. Nang leh kei hian tha leh zung pakhat mah kan thawh lova, a thlawna kan dawn liau liau a ni. Chutih rual chuan chu HMANGAIHNA hlantu tan chuan insen ral raihna a ni. Pathian hmangaihna thukzia, rilzia leh nasatzia te hi mihring finna leh hriatna te hmanga hrilhfiah zawh rual a lo ni love.