Sam 127 : 1 - “Lalpa’n in a sak loh chuan a satute chu an thawk rim thlawn mai a ni: Lalpa’n khawpui a vawn that loh chuan, a vengtu chu a meng thlawn mai a ni.”


        Kumthar chibai vek ule. Kum 2020 chu, hripui leng karah, harsatna hrang hrang paltlangin, Lalpa’n min hmanral tir leh ta a, kumthar, 2021 min hruaithleng leh ta, Kan Lalpa Pathian chu fakin awm rawh se.


        Kumtharah hian, rilru thar, ngaihtuahna thar, tum dan thar, khawsak dan thar, thil thar, kannunah hian lo thleng se, tiin kan ngaihtuah ve thin em aw. Kan hun hmanral tak te kha tumahin kan kokir thei tawh lo ang bawkin, kan la hman loh chu, kan tan awmzia thuk tak a la nei lem lo, tun hun erawh chatuan thleng pawhin a pawimawh reng dawn niin a lang.


        Mihring ruahmanna te , tum dan te, thawhrimna thlengin, Lalpa tel lo hian eng nge maw a lo nih chiah le? He khawvela mi hlawhtling, mi ropui, mi hausa, kan awh em em te nun leh khawsak, kan hre veklo naa, ngaihtuah chuan, an thawhrimna, an ngaihtuahna hman zawng zawng, an sum leh pai leh hausakna, engkim mai hi, thlarau khawvelah chhawm theih pakhat mah an nei si lo; thenkhat phei chuan, he damchhung tawite pawh hi a daih lo zu nia. Lal Isua tel lo chuan, engmah lo mai, a thlawn mai a ni.


        An thawkrim thlawn mai a lo ni. Tu ten emaw an rochun anga, a zar an lo zo pawh a ni thei e, mahse chu pawh chu, a thlawn mai chauh a ni. Lalpa’n in a sak loh chuan, a satute chu an thawkrim thlawn mai a ni, tih hi a dikin a pawmawm em em a ni. A nih leh hripui leng kara kan himna hi....Sorkar ruahmanna that vang nge, kan fimkhur thiam vang nge, Mizopa thisen that vang nge, Engvang nge ni ang le??


        Khing kan han sawi zawng zawng te khi, Lalpa tel lo chuan , a thlawn mai a lo ni. Lalpa’n khawpui a vawn that loh chuan, a vengtute chu an thawkrim thlawn mai a lo ni zawk. Kan himna, kan kulhpui chu, Amah Lalpa ngei chu a ni.


        Chuvangin, Kum 2021, hi Lal Isua nen ngeia engkim kan tih a, kan tun hun hi kan hman a va tul tawh em. A thlawn maia, he kum hlutak hi kan hman ral lohnan, Amah nen, hmang turin a hnenah i inhlan thar leh ang u.


                          Lalpa’n malsawm rawh se.