ISAIA 1:11-19

Thingtlang atanga Cancer natna avanga a nupui, Siaha Damdawi ina admit, Bill a peksak theih loh avanga lungngai leh rilru hah hmel han hmuh mai chu kei ringtu tha inti - KTP/KHP hruaitu/Sunday Sikul zirtirtu, Pathian rawngbawltu inti hi min va han dah tlawm tak em! Pathianin min lo dem ve ngei a ni tih ka hrechiang em em a ni.

Nikum March thla atang daih tawh khan Isaia 1:11-19 na thu hian ka rilru min hneh hle tawh thin a, a lo rei leh deuh a, ka ngai  neih leh mai a. Tanpui ngai ka hmu chu, "Lalpa, hei vang hian em ni, he Bible bung leh chang hi min pek?" tiin ka phun mawlh mawlh a. A nih chuan, tiin ka sum neih chanve pek ka tum ta a. Mahse, zing ka han tho chu ka ui leh a, thil dang daih ka ngaihtuah a; pek ka tum tawh lo. 

Ni 25/4/2021 Sunday zanah khan Isaia 1:17 na thu “Thiltha tihzir tawh rawh u; rorelna fel zawng ula, hnehchhiahna tuarte chu tanpui ula: pa nei lote chu rorelsak ula, hmeithaite chu sawipui rawh u.” tih thu leh, Mathaia 6:19-20 “Vanah, sulrul leh tuiekin a eichhiat lohnaah chuan, in tan rote khawlkhawm zawk rawh u; tih thu ka thinlungah a lo thleng a, tap lo thei ka ni ta lo! "Lalpa, min ngaidam rawh. Ka thil neih (engmah sawi tham loh) zawng zawng hi a ni maw I duh chu! Lalpa ka pe ang che. Pe theitu i ni a, la theitu i ni tih hi ka lo theihnghilh leh thin; min ngaidam ang che," tiin ka tawngtai a. Ka cheque ka phawrh  a, ka sum ka indah ve chu ka ta ni lovin, a neitu dik tak - Lalpa chuan a hmangaih em em, manganna avanga rum leh rilru hah em em mai chu min pektir ta a ni. Ka hlim em em a, ka lo ui ve thinna zawng zawng te chu a bo ta vek mai! Lalpa ropui ber rawh se.

Ka chunga thil ropui tak thleng hi ka chapo vang leh, miin fel min ti rawh se tihna thinlung neia rawn share che u ka ni lova. Pathian ropui nan leh ka member-pui ten hlawkpuina inneih ve ngei theih nana rawn puangchhuak ka ni. Kum hmasa lamah chuan Pathian fak hovin kan zaiin kan lam thin a, tunah chuan kan Pathian hian amah fak a duh dan hi ka nunah chuan a danglam daih thung a ni. Thuawihna te, dawhtheihna te mite tana luanchhuahna nun te hi min neihtir tawh zawk a ni.

Ka thalaipuite ka chah duh che u chu - KTP/KHP hruaitu, Sunday Sikul Zirtirtu leh active member niha theih tawpa Dan/tih tur tih vang ringawta Lalpa rawngbawl hi a awl em em a; keimah ngei pawh hi ka ni thin. Mahse, kan Pathian rawng kan bawl ve danah hian Lalpa a lungawi tawh lo, a tak taka (a zawng zawng) Lalpa ringtu/rawngbawltu kan nih hi a duh tawh takzet a ni tih hi I hre thar leh ang u.

Lalpan kan za tan mal min sawm sak theuh rawh se.