Kristian Thalai Pawla inhmang te hi chi hnih - zirlai leh hnathawk tawh tiin han then hrang ta ila. Hnathawh nei tawhte tan chuan ringtu kan nihna anga kan tih tur chu a chiang thawkhat mai a, rawng kan bawlna kawngah pawh keimahni lama kan inpekna te, taimakna te leh thahnemngaihnaah te thui tak a innghat a ni.

Tun tum chu zirlaite lampang hi kan thlurbing deuh dawn a ni. Mihringte tan hian zir tawp a awm thei lo; kan pian ni atanga kan thih thlengin zir tur nei kan ni ngei mai. Amaherawhchu, tun tum atan chuan  Zirlai tih hian Sikul kal te leh kan nitin khawsak relbawl nana thawhchhuah nei tura inbuatsaih mek te kan kawhtir dawn a ni.

Kristian Thalai Pawlte hi Kohhran kut leh ke pawimawh tak mai kan ni a, Kohhran leh thalai thiltihnaah pawh kan phak tawka tel tam a ngai reng a ni. Chutih rual chuan Pathian rawngbawlna kan tih hian zirna hi rawngbawlna pawnah kan dah fo. He ngaihdan avang hian zirlai thenkhat, KTP huanga inhman chungchangah harsatna nei an awm thin reng a ni. 

Ni e, tuna zirna kan sawi chungchang hi kristian ni lo tan chuan khawvel thil a ni ngei mai, nimahsela, keini ringtute tan chuan Krista rawng kan bawlna kawnga min tichaktu tur hmanraw pawimawh tak a ni tlat. Tirhkoh Pawla leh Mosia te han ngaihtuah ta ila, khawvel thiamna leh finnaah pawh sang tak an ni a, chu an thiamna leh finna te chu Pathian tan an hmang a nih kha.

Zirlaite, keimahni tan maia zir lovin, Pathian leh Kohhran tan thahnemngai takin zir ila, kan zirna lama kan hlawhtlin hunah chuan Pathian tana mi tangkai lehzual kan la ni dawn a ni. Chutihrual chuan meiling pawh a mal chauha a awm chuan a thi vat thin a ni tih hriain, kan awmna hmun apiangah kan phak tawkin Pathian ringtute inpawlkhawmnaah chuan tel zel turin kan inchah bawk a ni.

Lalpa’n a thu malsawm rawh se.