Lal Isua sawmna mawi tak hi Mathaia ziakah chauh kan hmu a, Lal Isua’n a hnena chawl turinthawkrim leh phurrit phur zawng zawngte min sawm a ni. Mihring thawhrimna leh tan laknain a pêk theih loh chawlhna Lal Isuan a pe thin a ni.

Thlarau lunngai leh phurrit phur, fuih leh tih chak ngai ten Isua hnen an panin hahchawlhna kim an chang thin. Thil dang engmahin chawlhna a pêk theih loh pawh Lal Isuan a pe thin a ni. Chuta chawl tur chuan Kohhranho min sawm a, chu sawmna chhangtu chuan Lal Isua hnenah a nghawngkawl bâtin a zir a ngai a ni.

Lal Isua nghawngkawl bah chu a hnêna mahni duh thu ngeia inbahluh emaw inpumpekna nun neih hi a ni. Thawhrimna leh phurrit tinreng chu rinna, hmangaihna leh beiseina nghawngkawla phurh chuan a zangin phurh a lo nuam thin a lo ni. Lal Isuan “Ka hnenah zir rawh u..” (Mat.11:29) a ti a ni. Lal Isua hnena zir tur chuan a nghawngkawl bah a ngai a ni. Lal Isua hnena zir chuan thuhnuairawlhna leh inngaihtlawmna a zir chhuak thin.

Phil.2:6-8 ah chuan Paula’n Lal Isua tlawmzia a rawn sawi a. Chu inngaihtlawmna chuan thi
khawp hialin thu a zawmtir a ni tih kan hria. Lal Isua nun hi inngaihtlawmnain a khat a, heng atang hian zir tur kan ngah hle a ni. Lal Isua Krista nun atanga kan zir tur, thuhnuairawlhna, hmangaihna, inngaihtlawmna, inremna etc. te hi Kristian ten nitin kan nunah seng luh kan tum a tul hle a ni.

Isua kha zirtirtu a ni a, keini Kohhranho hi a zirlaite chu kan ni. Kan zirtirtuin min zirtir leh min thiamtir a tum ber chu a chunga kan sawi tâk te khi an ni a, ringtute hi he kan zirlaiah hian kan pass dawn nge kan fail dawn tih mahni theuh kan in fiah a pawimawh hle a ni. A hnung zui tura a kohna chhangtu ringtute hian hengte hi Lal Isua hnenah kan zir tur a ni.

Keini ringtu intite hian kan nghawngkawl bah hi a rit lutuk ta em ni aw! ka ti thin. Lal Isua chuan, “Ka nghawngkawl chu a nuam a...” a ti a. Keini nghawngkawl ve hi a nuam lo a ni ti rawh u..? Khawvel mawina leh kan mit hmuh theih thil chi hrang hrang hi kan phur a, nghawngkawl a bah dan tur dik taka bat lovin, a letling zawnga kan hmalam nghawnga kan bah avangin kan chauh pui a, kan thihpui lo chauh zawng a nih hi.

Lal Isua chuan, “...ka phur pawh a zang a ni” a ti a. Keini phur chu a rit em a ni. Phurh zawh chi zia-zâng a ni hleinem. Kan nghawngkawl bahna a fuh lo lehzel bawk nen kan phur a zâng thei ngang lo a nih hi. Lal Isua chuan a hnena kala zir turin min sawm a, a hnena kal apiangte chuan chawlhna nuam an hmu
dawn a ni.

Lalpa’n a thu malsawm rawh se.