Mathai 27: 45 – 46. Tin, chawfak hun a chin behliang mun hun thlengin, khawvel a lo thim ta vek a. Tin, behliang mun hun lai vel chuan Isua chu aw ring takin Eloi, Eloi, Lama Sabakthani? tiin a au chhuak a (chu chu, ka pathian, Ka Pathian, engah nge mi kalsan? tihna a ni. Hei hi Isuan Kraws lera a thu sawi palina a ni a. Isua Krista hi a pian zanah kha chuan Vana Arsi eng in Bethlehem bawngin, Isua pianna zawn a chhun eng a, anchhedawng kraws-a a thih niah erawh chuan, Jerusalem khawpui leh a daivel chu, thimin a tuam thung a ni. Boralte zawnga chhandam tura a lo pian ni leh, anchhedawng kraws a nang leh keia sual phura a thih ni chu a in ang lo nasa hle mai. Thlaphang au aw a ni!

           

Hetiangin ngaihtuah ila, fapa pakhat chauh nei ila, misual hoin min man sakin a thawm ka hriat phak reng a, an sawisa, thlaphang au chuan, ‘Ka pa, Ka pa’ tiin min au sela, chhan thei hle siin, chhan thei dinhmunah ding si lo ila, (leilung pian hmaa Krista min tlan ang khan) Ephesi 1: 4. Pathian chu hmangaihna a ni si a, (I John 4:8), eng vangin nge a fapa mangang, thlaphang au chu a hawisan theih ni ang le? A ni zawngin Pathian anga awma, Pathian tluka awm chu thil thlakhleh hleih theihah a ruat lova, mihringte ang a lo piangin, bawih angah a insiam a, amah leh amah a intitlawm ta zawk a. Tin, mihring ang a lo awmin a inngaitlawm a, thi khawp hiala thu zawmin a lo awm ta a, krawsa thihna ngei chu. (Phil 2: 6 – 8)

 

Min chhandam tura, van Lalthutphah kalsana a tuarna hi a thukin a mak lutuk. Khawvel chhandam tura, Pathian chatuan remruat hi (Ephesi 1:4) pumpelh theih a ni lo. Gethsemani huana thlan thisena far khawp hial a kan Lal Isua dilna kha a hlawhtling lo nia! Min tlantu, kan sual phurtu a ni miau a. A tawi zawngin sawi ta ila, keimahni avangin Pathianin a kalsan a ni ringawt mai. (Isaia 53: 4 – 5)

 

A dang lehah chuan, Isua, Pathian fapa mal khan, kan sualte phura, kan aiawh a, anchhedawng kraws a, khenbeh a nih avangin, Pathian thianghlim leh bawlhhlawh kailo nen chuan, inlaichinna a neih loh avangin, a kalsan a ni mahna! Mihringte thlahtu Evi leh Adama anchhia, anih a kan nihna avang hian, keimahniah thil tha tihna reng reng a awm lova, (Rom 7:18) sual hlawm, hremhmun hmabak kan ni si a.

 

Khawtlangah leh mahni inchhungah, nu leh pa, u leh nau te lakah pawh tuitla lo te, khawvel sualna thilte avanga nun beidawng leh chau, nu hlutna pawh thlauhthla mekte tan, krista’n kawng a lo hawng reng e. Isuan I khawlohna zawng zawng phurin, anchhedawng krawsah, amahah chuan Pathian felna kan lo nih theihna turin, sual reng reng hrelo chu, Pathianin keimahni avangin sualah a siam ta a. (II Kor 5:21). Thlabarin, ‘Eloi, Eloi, Lama Sabakthani? tiin a pa a au a, a au ei zo si lo! A thlarau a thlah ta a. (Mathaia 27: 50)

He Isua Krista hi, ka sual tlanin a thi a, ka sual zawng zawng kristan a phur zo ta. A nak atanga thisen lo chhuak chuan ka sual a tleng fai zo ta, tih thutak hi I tan a ni tih pawm la, ring la, Pathian fa ilo ni dawn a ni. Pathian thuin, ‘Krista Isua rin avangin, Pathian fate in ni vek si a,’ (Galatia 3: 26). Krista hi a ring apiang te tan thiamchanna a ni e.