Luka 24 : 34 Lalpa chu a tho leh tak zet a ni, Simona hnenah pawh a inlar ta, an lo ti a.

    Thlan atanga, Lal Isua Thawhlehna hi, leilung pian tirh atanga, tun hun thleng pawh hian, thil ropui leh dangdai, ken tel tam tak nei a ni. Mitthi tho leh hi an awm nual maithei, Krista thawhlehna ang erawh chu, a la thleng ngai lova, a thleng leh tawh bawk hek lovang. Ringtute hian, chu thawhlehna avang chuan, kan nunah eng nge lo thleng ta, tih te, Pa Pathian thinlungah eng nge ken tel a neih, tih te ngaihtuah lem lova, Easter Sunday, hlim taka lo lawm ve ngawt pawh hi a awm theih awm e. Thil tamtak, kentel a neih zingah, a pawimawh zual, kan nuna danglamna thlen thei tlem kan chhui dawn a ni.


    I Pathian lungawina leh a chatuan remruat hlawhtlinna a ni: Eden a bawhchhiatna avanga Pa Pathian thinlung na leh, a anpui ngeia a siam, a lenpui theih, a pawl theih Mihring chu, a lakah Mitthi a lo nih tak avanga Pathian lungnihlohna zawng zawng chu, Krista thawhlehna ah hian, tih tawp/ nawh reh a lo ni ta a ni. Pathian a lungawi ta tih hi, kan hriat nawn fo a tha awm e. Mihring chhandam tura a ruahmanna zawng zawng hmawrbawkna leh hlawhtlinna a ni, kan ti thei ang. Siamtu Pathian leh Thilsiam hlu ber, Mihring inremlehna a ni. Chu inremna avang chuan, kan Pathian hi a lungawi a, a hahdam ta tih hi, kan hriat chian a pawi mawh hle. Krista thihna leh thawhlehna –ah hian lung awi lo ta se, chhandamna dang a buatsaih leh tawh ngei ang le. A thihna chu sual lam kawngah chatuan atan vawi khat chauh a thi a, a nunna erawh chu Pathian lam kawngah a nung a ni. (Rom 6 : 10)


    II Nunna thar lo chhuahna a ni : Eden atanga chhuak, sual pu taksa chu, Krawsah chinral a ni a, thlanah phumin a awm a, Krista thawhlehna ah erawh chuan, Nunna tharin kaihthawhin a awm.  Thil siam thar hlak, nunna thar, chatuan daih nuna hi, Amah ringtute nihna, Pathian thuin min puan sak chu a ni. Chu Nunna thar chu, Krista felna leh thianghlimna zarah, Amah nen inremin an awm a, an leng dun thei leh ta a, chatuana nung turin a siamthar leh ta a ni. Chuvangin a thihnaah baptisma kan chanin, a hnena phum vein kana wm, Pa ropuinain Mitthi zing ata Krista a kaithawh ang khan, keini pawh nunna tharin kana wm theih nan (Rom 6:4) Chu mi avang chuan tupawh Kristaa awm chuan thil siam thar a lo ni a, thil hlui te chu a ral ta a, ngai the u a lo thar ta.


    III Pathian khawngaihna Mihring lama tih famkimna a ni : Pathianin, Dan hmangin Mihring siamtha turin leh a mite, a hnam te ni turin, Israel fate kha nasa takin a kaihruaia, kawng dik a kawh hmuh a, an hmelma te a hneh sak a, an tui a halin, in tur a pe, an ril a tamin eitur a pe a ni tih kan hria. An bawhchhiat leh, pathian dang te rawng an bawl chu an thulh phah chuang lova, hrem an ngai leh thin. Sual thawi nan, ran thisen te hlan thin mahse, anmahnia sual kai, Eden hri chu a ser a reh thei chuang lo; hlawh chhamna hlir a ni mai awm e. Pathian khawngaihna danah erawh, dan thua thiam chang thei tawh lo - Mihring chu, Krista rualin Mihring thar/ Thilsiam tharin a kaitho ta a, Krista felna leh thianghlimna chu a ensak tawh zawk avangin, mi fel lo chu, Mifelah, Mi thianghlim lo chu, thianghlimah a puang ta tlat mai. Dan hnuaia Mihring tlinlohna langsar em em thin chu, Pathian khawngaihna danah erawh chuan, Krista thihna leh thawhlehna a lo langsar ta zawk a, a thianghlimna chuan sual ser a tireh ta a ni. Chu chu, Pathian khawngaihna Mihring lama a lanchhuahna, khawngaihtu thinlunga chiang em em mai chu a ni. Chu khawngaihna dawng tur chuan, a khawngaihtu thinlungah Ramri a awm tawh lova, Hnam bil a awm tawh lova, Jentailte tan pawh chan theih a lo ni ta zawk a ni. Mi zawng zawng hnenah chhandamna rawn thlenin, Pathian khawngaihna a lo lang ta si a (Tita 2:11) Rinna avanga khawngaihna a chhandam in ni (Eph 2 : 4)


    IV Sual Setana tlawmna a ni: Pathianin chhandamna abuatsaih dan hi kawng thui tak a ni. Chhandamna hna thawk tura “Thi tlak” zawn a ni a, Amah chiah a ni si, A ropuina zawng zawng kalsanin, thilsiam -Mihringah a lo chan a ngai a, a inngai tlawm a, thi khawp hiala thu zawmin,  Pathian thalrau kalsan hial nih angai a, Krawsah a nunna hlan ta a, Phumin a awm a, a tho leh ta a. A thawhlehna ah chiah hian, he chhandamna hna hi a puitlinga, a hlawh tling a, a lungawi ta a ni. Thawhlehna tel lo Chhandamna a siam hauh lo. Setana thil tum bulpui ber, Pa Pathian dodalna, a thilsiam zinga hlu ber tihhlumna, Chatuan hremhmuna ama rual a luh pui tumna zawng zawng chu, tih hlawhchhamin a awm ta a, Chu thawhlehna avanga Mihring chhandamna chu, Setana hnehna, tihtlawmna, tih hlawhchhamna, Hnehna ropui, Van kan thlen thleng pawha, ringtuten kan chhuan tur a chu a ni. Krista ngei chu, Minung leh Mitthi Lalpa a lo ni ta.(Rom 14:9)


    Thlan atanga ropui taka Lal Isua thawhlehna ni champha kan hman lai hian, Kohhran hote hian zawhna kan in zawh nawn a va tha dawn em, rilruin I chhang theuh teh ang u.

1. Nangmah ah, Pa Pathian hi a lungawi tawh em ? A thinlungah danglamna a thlen ve tawh em?

2. Thilsiam thar niin Nunna thar I nei tawh em? Nge I la danglam chuang lo?

3. Pathian khawngaihna nasa tak avanga I nihna thar chu I nunpui thei em? Lawmthu I sawi thei tawh em?

4. Setana chu a tlawm ta a, a hlawh chham ta a, I nun a la ti derthawng tho em??? Krista thawhlehna avanga I nihna thar hmang khan hnehna I puang thin em?


    Lalpan, kan thlarau nun tichak thar zelin mal min sawm sak rawh se.

   

    Amen.