RINNA

Rinna tih hi kan Bible-ah hian thumal pawimawh ber a ni kan ti thei hial awm e. “Rinna” hi Pathian thutiam leh a hnathawh a taka kan channa hmanraw pawimawh tak a ni. Tlemte han lachhuak ta ila:

    Rinna avanga chhandam in ni (Eph.2:3)

    Rinna avangin thiam changin kan awm (Rom.5:1)

    A chunga kan sawi atang ringawt pawh hian rinna pawimawhna kan hmu thei ang. Lal Isua pawh khan rinna hi a ngaipawimawh khawp mai. Lawngah a chuang a, zirtirte chuan an zui a. Dil chu nasa takin a fawn ta a, tui fawnin lawng chu a vur hlup hlup mai a; Ani erawh chu a muhil a, an kaithova, “Lalpa, min chhanhim rawh, kan boral dawn hi” an ti a. Isua chuan, “Rin tlem te u, engah nge in hlauh?” a ti a. Zirtirte an thlaphan tawh tehreng nen Isua chuan ama bula awm reng chunga amah ring tawk lova an thlaphang kha mak a ti a, “Ka awm ve reng a, enga tinge in thlaphan? Engkim chunga thuneitu ka nih in ring lovem ni?” a tihna tluk a ni. Isua a lo thova, thli leh dil chu a hau a, a lo reh ta thuap mai! Vawiin thleng hian Isua ringa zuitute hian kan ring tawk lova, kan thlaphang leh thin a nih hi! Isua chuan amah ring tlat turin min duh si.

    Lawngah Isua zirtirte an chuang a, dil lai taka an awm laiin thliin a ni lo zawngin a beng avangin tui fawnin a vawrh a vawrh ta a. Khawfing chah dawn laiin, Isua chuan dil chungah ke a kalin an hnen lam a rawn pan a. Zirtirte chuan, “hmuithla a nih saw” an ti a, an thlaphang a, hlauvin an au ta vak mai a. Nimahsela, Isuan anmahni a be ta nghal a, “Thlamuang takin awm rawh u; keimah ka ni alawm; hlau suh u,” a ti a. (Mathaia.14:26-27) A’n kal hrang hlawt a, Isua an hrechiang lo leh ringawt a. Keini ho pawh hian Lal Isua Krista hi kan hrechiang tak tak em? Kan pianthar tirh laia kan chian angin kan chiang zel em? Hmuithla emaw kan ti ve dawn em? Kan inngaihtuah a tul hle in ka hria.

    Petera khan Lal Isua tui chunga kal a hmuh khan kal ve a chak tlat mai; “Lalpa, nang i nih chuan tui chunga i hnena lo kal thu mi pe rawh” a ti a. Ani chuan, “Lo kal ta che” a ti a. (Mat.14:28). Petera chu lawng ata a chhuk a, Isua hnen lam panin tui chungah chuan kein a kal a. Thli a lo tleh a, chu thli tleh chu a hmuhin a hlau a, a pil dawn ta mai a, “Lalpa, min chhandam rawh” tiin a au ta a. Isuan a ban ta nghal a, amah chu a chelh a, a hnenah, “Nang rin tlem, engah nge i rinhlelh le?” a ti a; lawnga an chuan chuan thli chu a bang ta nghal mai a. Lawnga awm te chuan, “Pathian fapa i lo nih takzet hi” tiiin amah chibai an buk a. (Mat.24:28-33)

    Petera chuan thli tleh en lovin Isua kha ring tlat se la chuan Isua hnen a thleng ve mai tur a ni a. Keini pawh hian Isua en lova thil dang kan en chuan Rinnaah kan nghet tak tak thei lovang, Lal Isua i ring tlat ang u. Lal Isuan, “Rin tlemte u” min tih mai loh nan nghet takin i ring tlat ang u.

    Kohhranhote hian Rinnaa kan awm leh awm loh keimahni leh keimahni kan infiah thin a pawimawh khawp mai. Kan ram Kohhrante hi kan inkhawm tam thin ta lo viau mai te hi eng nge a chhan? Nilai zan, Inrinni zan leh Chawlhni zanah phei chuan 15% hi kan inkhawm ta mang lo. Kan rinna hi i inenfiah teh ang u. “Ka rina chu ka hria, chumi ni atan chuan ka vawng tha thei tih dik takin ka hria” kan ti ve thei ang em?

    Lalpa’n malsawm rawh se.