(Thupuan 21 : 4)    An mit ata mittui zawng zawng a hrufai ang a; Thihna a awm leh thei tawh lo vang a, Lungngaih te, tah te, nat te pawh a awm leh tawh hek lo vang; Thil hmasate chu a ral ta,” a tih ka hria.


Thihna hi a rapthlak a,  inhnem vak ngaihna pawh hi a awm lo. Hunin a liampui ve mai an tih hi a dik a, tu chhungkaw program maha tel ngai lo thil a nih bakah, thi lo tura piang an awm lo bawk.

Ringtute tan thihna hi chi hnih a awm a - Thlarau thihna  leh  taksa thihna a ni. 

THLARAU THIHNA:-

Thlarau thihna chu Pathian nena inthenna, Pathian nena inzawmna reng reng awm lo, Pathian lak atanga thihna a ni. Evi leh Adama chu Eden huanah suala an tluk avangin Pathian lakah mihrang an lo ni ta a, Pathian nen an inthen a ngai tawh. Eden huanah an awm thei tawh lo. Kumkhuain Pathian hnen ata lakbo an ni. Chutiang chu a ni Thlarau thihna chu. A rapthlak a, a hlauhawm bawk. 

Beisei tur dang reng reng awm tawh lo; chatuana thihna leh boral hlenna a ni.


TAKSA THIHNA:-

Taksa thihna hi mihringte thlirna atang chuan a rapthlakin a na zawk awm e. He kan taksa, vaivuta siam hi vaivutah, kumkhuaa he khawvel hmu tawh lo tura kalsanna, khawvel nena inthenna  a ni. 

Kan hmangaih ngawih ngawihte leh kan ngaih em em te engtikahmah hmu tawh lo tura khawvel an chhuahsan chuan tunge na ti lo ang a, tunge tuar lo bik ang. Mihring thlirna atang chuan a rapthlakin a na a ni tawp mai. Tuar thiam tak tak an awm lo.

Lal Isua ngei pawh Lazara thihna avangin a tap ve a ni kha. Amaherawhchu, ringtute tan chuan taksa thihna hi kan tawpna tur a ni lo tih hi kan hriatchian a pawimawh hle.

A chhan chu lei leh van lal berin  thihna hnehin a tho leh tih kan hriat vang a ni. Keini, amah ringtute  hi a thawhlehna tawmpuitute kan nih avangin he thihna hian min chelh hlen tawp lo ang tih kan hria. Kan Bible chang thlanah khian Lei thar leh Van thar a din huna ringtute awmdan tur kan hmu. Chumi tur chuan he taksa thihna hi kan paltlang ngei a ngai si a ni. Ringlomite tan erawh taksa thihna hi an tawpna tur, beisei tur awm tawh lo, chatuana thihhlenna a ni.


Pathian remruat danglam ngai lo nunna thar kan neihna tura kan kailawn hmasa ber chu thihna hi a ni. Chu kawngah chuan leia kan thiltihte hi kan rahbi pawimawh kan kailawn indawh chho zel ang a ni. Chung chu vawiina a ram zauh nan thahnem ngai taka a rawng kan bawlna te hi a ni. 

Lalpa tana rinawm taka kan nung lo a nih erawh chuan, kan kailawn zawh hian Vanram thleng zo loin a tawp ang tih a hlauhawm hle. 


Davida chuan a fapa damlohna avangin Pathian a au a, sai ip puan sinin, chaw a nghei a, a tuar em em. A fapa a thih meuh chuan Lalpa remruatna chu thiam takin a pawm a ni.


Pathianin ka mifel ti a a sawi Joba ngei pawh khan a chunga tuarna an thlen tak tak chuan a pianni kha anchhia lawhin pian ve loh law law kha a chak mai a nih kha. Mahse chhel takin Pathian rinchhanin a tuar hram hram a, a tawpah Pathianin a chawisang leh ta tih kan hria. Khawdur a kian hian ni a lo sa thin a, zan thim a ral hian khua a var thin. Chutiang chiah chuan kan tawrhna, kan lungngaihna tawpah hian hlimna, lawmna a awm tih kan hriat hi a pawimawh.


Tuarna hi vaivut ata lo chhuak a ni lova, buaina pawh hi lei atanga lo chhuak a ni hek lo; buai turin mihring hi a lo piang a ni zawk. Kan tuarna te, kan natna te hi Pathian hnenah kawltir hlauh ila ani'n a tih dan a hre em em a ni.  Kan hmangaih em em te, kan thlakhlelh leh kan ngaih ngawih ngawihte nena chatuana inthen chu a rapthlak  em a ni. Taksa inthenna pawh na kan tiha kan tuar theih loh chuan chatuan atana inthen thlarau thihna chu kan ngam dawn em ni?


Thlarau thihna  pumpelh theihna kawng awmchhun chu Krista rin mai hi a ni. 

Tumah keimaha kal lo chu Pa hnen an thleng lovang a tih kha.

Lalpan a thu malsawm rawh se!