Tunlai khawvelah chuan signal tha a pawimawh em em a. Signal a that loh chuan engkim a buai a, kan chhungril nun thlengin buaina nasa takin min chim thin a nih hi. Signal a that loh chuan office zawng zawngah hna an thawk hlei thei lova, Financial Institution zawng zawng a buai a, chu chuan mipuiah harsatna namen lo min thlen thin a ni. Chutiang khawvela kan chen tawh avangin chhung tin, mimal tinin signal tha kan zawng a, man to tak takin company inzuarte hnenah kan lei thin a ni. Chutiang signal tha tak kan neih chuan nuam kan tiin kan nun pawh a hlim a, kan mamawh hrang hrang kan khawih thei a, tu dang ngai lêk lovin mahni chauhvin kan khawsa thin a ni. Chutiang taka khawvel pawhin signal tha a mamawh chuan, Pathian nena kan inbiakpawhna signal ve thung hi enge ni ang le? tih hi ngaihtuah a ngai a ni. Kan Pathian be pawp tur hian eng tik lai pawhin signal tha a awm a, khawchhiat te leh electric chhiat te leh thil dang avangin he signal hi a chhe ve ngai lova, kawilaiah pawh signal hi a awm vek a ni. 

He signal hi a man chawia connection tih ve a ngai lova, a thlawn vek a ni. Amaherawh chu a hmangtu hi nitin, darkar tin hian an tlem tial tial niin a lang. Chu signal hrui chu a danglam ve viau asin. Johana.15:5-ah chuan Lal Isua’n heti hian min hrilh a, “Kei grep hrui chu ka ni, nangni a pêngte chu in ni” tiin min hrilh a, kan inzawmna thu a sawi a ni. 


He signal nei tha em em tu leh Pathian nena inzawmna tha tak nei tlat tu chu Petera kha a ni. Lal Isua an man a, an sawisak zan khan Rome hote khan “Nang pawh an zinga mi i ni lawm ni? I tawng danah pawh a hriat alawm” tiin an chhal a nih kha. Lal Isua leh Petera te inthlunzawmna hrui kha a tha hle a ni tih a chiang a, “Ani chu ka hre lo” a tih lawm lawm lai pawhin, “I tawng dan atang pawhin an zinga mi i ni” an ti thei tlat a, Petera hmelah Lal Isua an hmu tlat a ni. 


Helaiah hian zir tur kan va ngah em ve aw! Mi ten kan nungchangah te, kan hnathawhnaah te leh mi zinga kan khawsak phungah te hian Lal Isua hmel an hmu ve ang em le tiin ka ngaihtuah ve thin. Tunlai khawvel, sum leh pai ngaihtuah a damchhung khawsak nawmna thlakhlehna chauh ngaihtuah ringtu zingah hian engzat tak awm ang i maw!!! Khawvel pen rualin kan pen a, Lal Isua avanga chan ai chuan a sawi mam dan kan ngaihtuah hram hram thin a nih hi. 


Chuvangin, Lal Isua nena kan inthlunzawmna hrui hi a chah loh nan Engkim nei a, engkim chunga thuneitu kan Pathian hnenah innghat tlatin a hnenah i kir leh ang u.