Fianriala Lalpa pawlna hun hmang ngai lo ringtu tumah an chak thei ngai lo an ti thin a, a dik hlein ka hria. Rawngbawltu tam tak, Pathianin a hman em em te hi fianriala Lalpa pawlna nei thinte an ni. Fianriala Lalpa an pawlna chuan Kohhranah te, rawngbawlnaah te leh khawtlangah te rah tam tak a chhuah thin a ni. Fianriala Lalpa pawlna nei thin Kohhran chu Kohhran chak an ni thin. Kohhran mi, ringtu in ti si a, fianriala Lalpa pawlna hun hmang ngai lo mi kan nih chuan inenlet a tul hle ang. Fianrial nun kan sawi laiin a huhova Lalpa pawlna erawh hi chu thulh chuang si lo ila. Kan Kohhranin nilai zan inkhawm an titawp rih pawh hi fianriala Lalpa pawlna kan neih tam theihna tur atan hmang hlauh ila, a va tha dawn em. Mosia pawh kha Pathianin thusawmpek a pek lai khan mipui zingah ni lovin, fianrialah amah chauhvin a nih kha. Isua’n Gethsemani huana a tawngtai khan a zirtirte zingah ni lovin tlemin a kal hrang tih kan hmu bawk a ni.

Heta tang ringawt pawh hian fianrial nun pawimawhzia chu a hriat theih awm e. Pathian kan hnenah a inpuan dawn chuan a huhova kan awm lai ni lovin fianrialah a ni zel thin. Thupuan ziaktu hmangaih Johana hnena Pathian a inpuanna pawh kha fianrialah, Patmos thliarkarah a nih kha. Mahni chauh pawhin sual kan dovin thlemna kan do thei, mahse rahchhuah, ringtu tha leh tlo nih kan duh chuan fianrialah Lalpa pawlna kan neih tam a ngai a ni. Ni khata darkar 24 kan neihah hian eng zat nge Lalpa pawl nan hun kan hman thin? Thalai tam zawk chuan Social media-ah kan hun tam zawk kan hmang mai lovang maw ? Thalai chauh pawh ni lo, nu leh pa thenkhat pawh hi kan ni mai lo maw? Fianriala Lalpa pawlna nei ngai lo ringtu kan nih chuan in enfiah kan ngai tak zet ang. Fianrial nuna Lalpa pawlna tur pawimawh thenkhat han tarlang ila.

 

1.      Fianrial Nun -Tawngtainaah (Matthaia 6:6, Daniel 6:10):

Mi thiamte chuan kan tawngtaina hi Pathian kan biakna an ti thin a, a dik hlein ka hria. Tawngtaia Lalpa pawlna hi ringtuten kan tih ngei ngei tur leh rinna kawnga kan mamawh em em a ni. Tawngtaina hi Pathian hnena kan mamawh kan thlenna a ni bawk. Mahse tunlai ringtute erawh hi chuan tawngtai hi kan peih mang tawh lo niin a lang. Rawngbawltu Pathianin a hman em em te pawh hi tawngtai tam lutuk avanga an khup belkang tawh te an ni hlawm. Kan Mizoram chhung ngeiah pawh fianriala tawngtaina hmang thin thalai tam tak an awm a ni. Chung an fianrial tawngtaina chuan pawn lamah rah tam tak a chhuah ta thin a ni. Daniela’n, a thianten an hekna Lal Daria’n a pawmpuia hming a ziah hnan tih a hriat veleh a tukverh te hawngin Jerusalem lam hawiin nitin vawithum a tawngtai thin tih kan hmu a ni. Daniela’n nitin fianriala tawngtaia Lalpa a pawl thinna chuan harsatna karah pawh rinawm takin a din ngheh tir a ni. Daniela’n tawngtaina a ngai pawimawh a ni tih kan hre thei bawk a ni. Nang leh kei pawh fianriala tawngtaia Lalpa pawlna hi kan mamawh a ni tih hriain theihtawp i chhuah thar ang u. Mifel tawngtaina chuan thil tam tak a ti thei si a.

 

2.     Fianrial Nun - Bible Chhiarnaah (Sam.119:105, 119:9, Joh.1:1)

Mi thiamte chuan Bible kan chhiar hi Pathianin min biakna a ni an ti a. Tawngtainain Pathian kan bia a, amah Pathianin min biak ve kan duh chuan Bible (Pathian thu) kan chhiar ngei ngei a ngai a ni. I thianpa kha be char char la, a biak ve dawnah che duh lo ta la, a thinrim ngawt ang. Chutiang chiah chuan keini pawh tawngtainain Pathian kan bia a, min biak let kan duh loh chuan a dik thei lovang a, kan inzawmna pawh a tha thei hek lovang. Pathian thu ( Bible) chhiar ngai lo ringtu chuan Pathian duhzawng a hre ngai lovang. “Atirin Thu a awm, Thu chu Pathian hnenah a awm, Thu chu Pathian a ni” tih Bible-ah kan hmu a. Heta tang ringawt pawh hian Bible (Pathian thu) chhiar hi ringtute tan a pawimawhzia chu a lang chiang em em a ni. Sam ziaktu chuan ‘I thu hi kan ke atan te hian khawvar a ni a, ka kawng atan eng a ni’ tiin min hrilh a ni. Ringtute kan kawng min êntu chu Pathian thu (Bible) hi a ni tih hriatchian a pawimawh. Pathian thu kan chhiar loh chuan Pathian duhzawng kan hre thei lovang. Pathian duhzawng kan hriat loh chuan a thu kan zawm thei lovang a, a thu kan zawm loh chuan ama mite kan ni thei dawn lo a ni. Chuvangin, ringtuten fianriala Bible chhiara Pathian pawlna kan neih tam hi a tul takzet a ni. Tirkohte thiltih kan en chuan Beroi khaw mite chuan Paula leh Sila thusawi kha a dik leh dik loh hriat nan nitin Pathian lehkhabuah an zawng thin tih kan hmu a ni. Heta tang hian Bible hi kawng dik min kawhhmuhtu, min hruaitu a ni tih kan hre thei ang. Kan ramah hian enga tinge piangtharte hi kan dâk leh hma em em kan tih chuan Pathian thu (Bible) kan chhiar thin loh vang a ni. A huhovin kan tawngtai a, fianrialah kan tawngtai peih si loh va, Pathian thu kan chhiar peih bawk si loh chuan engtin nge kan chak theih ang. Miin a taksa tana mamawh chaw a ei loh chuan a chak thei ngai dawn lova, chak chu sawi loh, a lo rei hnu chuan a hmabak chu thih a ni mai. Chutiang chiah chuan keini ringute pawh thlarau lam chaw kan ei loh chuan kan thlarau nun a chak thei ngai dawn lova, ringtu thi kan ni mai dawn a ni. Chu Thlarau lam chaw kan lakna tur chu Bible hi a ni. Bible hi tisa leh thlarau tana nun kawng hruaitu tha ber a ni. Chuvangin, ringtute chuan a tam thei ang ber Pathian thu hi chhiarin zir ila, kan thlarau nun i chawm ang u.

 

3.      Fianrial nun rinawmnaah ( Genesis 39:7-9):

Josefa chu a pu nupuiin mutpui tura a thlem lai khan midang tumah an awm lova, a fianrial khawp mai. Mahse, tuman hmu loh mahse Pathianin engkim a hmu vek tih hriain Josefa chuan, “Engtin nge he sual lian tak hi tiin Pathian chungah thil ka tihsual theih ang?” tiin a chhang a nih kha, a va ropui tak em. Tunlai thalai tam tak chu ni ila chuan “Yes” kan tih nghal a rinawm. Nang leh kei pawh Josefa ang hian ni tin kan nunah; hnathawhnaah, zirnaah, sumdawnnaah leh thil dangah te pawh thil tha lo tihna tur hun remchang a awm ve thin ang. Josefa ang hian engkimah kan rinawm ve a tul a ni. Kan ram kalphung hi enga tinge a dik thei loh tih te hi kan ngaituah ngai em? Thawktu tam tak hi Kohhran mi tak tak, Upa, Rawngbawltu leh Fellowship Department hrang hrang hruaitute kan ni tho si a, enga tinge eiruknate hi a hluar em em le? Ringtute hi kan hnathawhna/kan eizawnnaah kan rinawm thin lo a ni mai lo maw? Kohhran thiltih (activities) chhuanlamin kan hna hi kan inthlahdah thin em? Hetiang mite hian Lalpa hmel an hliah fo thin. Nang ringtu, Lalpa hmel hliah fotu i ni thin em? kan inenfiah a tul takzet a ni. Kan nitin nunah ringtute hi rinawm takin awm ila, tuma’n min hmu lo mahse Josefa angin rinawm takin awm zel ila. Chutichuan, Lalpa ram a lo zau zel ang a, kan ram pawh dintharin a lo awm leh thei dawn a ni.

 

4.    Fianrial nun - thiltha tihnaah ( Mathhaia 6:3-4, Ephesi 2:10):

“Chutichuan, tupawh thil tha tih tur hriaa ti si lo chu a tan sual a ni” (Jacoba 4:17). Thil tha ti atan Krista Isua-ah chuan siam kan ni si a. A bik takin thalaite phei chu tanpui ngaite tanpui hi kan dinchhan pakhat a ni. Mi vervekte chuan mi fak an hlawh theih nan inah te, kawtthlerah te an pe thin a, an lawmman chu an hmu zo tawh tih Bible-in min hrilh a ni. Nang leh kei erawh chuan mite hmaah ni lo, a ruka hmu thintu Pathian hmaah thil tha i ti thin ang u. Kohhran pawhin thil tha tiin Kohhran chhungkuaa tanpui ngaite chu a tanpui thin a, a lawmawm takzet a ni. Kohhran member ka ni a, Kohhran thiltihah hian ka tel ve thova, a hranpaa tih a ngai tawh hleinem kan ti dawn em ni? Ni love, Kohhran pawhin a ti ang a, mimal pawhin kan phak tawk leh kan theih tawkin thil tha kan ti ve tur a ni. Mahse, mite hmaa mahni hmingthatna tur ni lovin Pathian ropuina tur zawkin i ti thin ang u. “Chutichuan, in ei pawhin, in in pawhin, in tih apiangah pawh, Pathian ropuina tur hlirin ti rawh u” (I Korinth.10:31). Thil tha ti tura siam kan ni si a. Chu thil tha tih chu kan awmna tura Pathianin a buatsaih lawk a ni. Kan vanglai, kan thatlai leh kan chak lai ber hian Pathianin kan awmna tura a buatsaih leh kan dinchhan tihlawhtling turin thil tha tihna kawngah theitawp i chhuah thar leh ang u. I upat hunah chuan duh angin thil tha ti duh mah la; i duh angin i ti thei tawh lovang. Thalaite u, tun hi thil tha tihna hun tha ber a ni e. 

A tawp berah chuan fianrialah tawngtai leh Pathian thu (Bible) chhiarin Pathian pawl tam ila, chutichuan, ama hmingin thil tha tam tak kan ti thei dawn a ni. Chutichuan, Kohhran, Khawtlang, kan thenawm khawvengah rah tam tak kan chhuah thei dawn a lo ni.

“Thlamuang takin ka mu ang a, ka muhil bawk ang: LALPA, nangmah ngei hi a ni, mahni chauh pawha him taka mi awmtir thin hi ni”.(Sam 4:8)