Hripui avangin chawlhni 46 biak in kan khar hman a. Hripui avang bawkin Mizoram sawrkar chuan a tumhnihna atan ni 20th April 2021, zing dar 4 atanga 26th April 2021, zing dar 4 thleng hman tur lockdown a puang leh ta rup a nih kha. Kan duh vang leh intihluihna ni hauh lovin ringtu te nun kawnga thil pawimawh tak pakhat inkhawm, zaiho, tawngtaiho, fellowship etc... kan thei leh ta lo! 

Isuan a zirtirte hnenah an him nan Jerusalem tlanchhuah san hun, titiautu tenawm (khatih hunlaia Rom sawrkar) Jerusalem an hual hunah khawpui tlan chhuah san tur a ni tih thu a sawi a nih kha (Marka 13:14). Isua thusawi ngaihvena a tumkhatna an hual khan Isua thusawi ringtute tan chhinchhiahna (sign) a ni tih hrethiam a, Jerusalem tlan chhuahsantute chu kum A.D 70 a Rom General. Titus-a hoa Jerusalem an tih chhiata an tingmit vek lai khan, ringtu pakhatmah an thi ve lo a nih kha. 

Zaipawl zawng zawng an reh thuap hun. Thuhriltu pawh an awm loh hun te hi kan thleng mek chu a ni ta mai lo maw? Kum khat zet Inkhawm theiloa mahni ina kan awm khan, kan thlarau nun hi a sang sawt nge, a hniam hle zawk? Kan ringtu nun hi a huho chauha chak tur nge, mimal taka belhchian dawl tur. Isua hian a huhoin nge min koh mimalin. Kohhran hi a huho nge mitin hi. Kross-a Isua thihna hi a huho tan chauh nge, mitin tan zawk. Ka sawi duh chu hei hi a ni. Ringtu nun hi a huhoa in tichaka, in dawmkanga, thawkho tur chu a ni teh meuh mai. A tak takah chuan tumah hi kan in rin kepin kan in thawksak thei lo, Isua hi a mimal taka kan hriat hi a ngai a ni. Inkhawm theih lai chauha ringtu chak i nih chuan chakna hun a tlem viau lo ang maw. Isua hian i mimal nun (private life) kha a duh ber a ni. Sam ziak tu chuan, “LALPA, nangmah ngei hi a ni, mahni chauh pawha him taka mi awmtir thin hi ni (Sam 4:8). 

Sikul naupang te pawh hian a huhovin lehkha zir mah se fiahna (exam) erawh mimalin an hma chhawn thin.

Awle, engpawh lo thleng se. Eng hun pawh lo thleng mah se. Isuan min awmpui a tiam kha i hre reng ang u. 

1 Petera 4:12,13 “Duh takte u, in zinga fiahna nasa tak lo awm, nangmahni fiahna tura in chunga lo thleng hi, thilmak in chunga lo thleng angin mak ti suh u. Krista tuarnaahte tuarpuitute in nihzia ang zelin lawm zawk rawh u; chutichuan a ropuina a lo lan hunah chuan nangni pawh hlim takin in lawm thei ang”.

Isuan chuan min kalsan ngai lova, a kohhran pawh a thlahthlam ngai lo. Mimal tin hi Isua hriatnaah leh rinnaah thang lian deuh deuh turin min duh a ni. 

Tunlai thil theng mek te hi hrethiamin mimal tinte kan thlen chin atang khan hma i sawn zel ang u.