“Nimahsela, ramhuaite in thu thua an awm avângin lâwm suh u, vâna in hming ziak a nih avângin lâwm zâwk rawh u” a ti a. (Luka 10:20)

Lal Isuan zirtir sawmsarih a tirh chhuahte chuan an rawngbâwlna a an hlawhtlinzia leh an rawngbawlna avânga ramhuaite pawh an thu thua an awm thu hlim takin an hotupa Isua hnênah an rawn thlen a. Isua chuan an rawn report hma pawhin an thusawi avânga ramhuaite thiltihtheihna têk ang maia ranga tihtlâwm a nih tâk thu a lo hmuhpuizia a lo hrilh hlawm a. Amaherawh chu, ramhuaite an thu thua an awm avâng chauhva an lâwmna aia hlu zâwk lâwmna chhan tûr a hrilh hlawm a. Chu chu Vâna an hming ziak a nih avânga lâwm zâwk tûr an nih thu a ni.

 

Zirtir sawmsarihte zingah hian Zirtir sâwmpahnihte kha an tel ve ngeiin a rinawm. Tûnlaia Revival Team ang deuh hian Lal Isua hian team a siamsak hlawm a ni ve ngei ang. Heng team memberte hi an kal chhuah hmain an hming an ziak vek ngei ang. Vanram Chabi neitu Lal Isua ngeiin Vanah an hming ziak a ni tih a hrilh tlat mai. Lal Isua tirh an nih avânga an hming ziak a nih kha Lal Isua hian Vâna hming ziak an ni tih a pawm a ni.

 

Mt. 16:19 - ah Lal Isuan a kohhran dinte hnêna vanram Chabi a pêkte khân leia an phuar chu vânah pawh phuar a nih leh leia an phelh chu vânah pawh phelh a nih tûr thu a sawi a. Lei hmuh theih Kohhranin an hming an ziahte chu hmuh theih loh vân kohhranin lo pawmin vanah an hming ziak a ni ta a ni.

Chuvângin kohhran hi Paula pawhin Krista taksa a ti a nih kha. (I Kor. 12: 27) Kohhran member tinte hi Krista taksa pêngte vek kan ni. Krista taksa pengte chu vâna hming ziakte kan ni. Hmun dangah i hming ziak a nihna zawng suh, kohhran, Krista taksaa i hming ziak a nihna bâk hi i hmu chuang lovang. Lal Isua hi Pathian fapa a ni tih ringtute hi kohhrana awm, vâna hming ziak, khita hming an lam hun pawha awm tûrte chu kan ni e.

Inlârna emaw zêla awma vâna i hming ziak a nihzia hriattirna hranpa dawn beisei suh. Kohhran hi Krista taksa a nihzia Bible-in min hrilh hi a tâwk a. Krista taksa kohhrana i awm chuan Pathian mi hriat, vâna hming ziak i ni tih inhriain Krista taksa pêng tangkai tak ni tûrin inbuatsaih ve tawh mai rawh le. A eng kohhran ber hi nge, tiin kohhran pâwl dik zawng suh, Isua hi Krista, Pathian nung fapa, Krista a ni tih pawmtu apiang kohhrante hi lungpui chunga kohhran dinte chu an ni mai. Vâna hming chuang tawh i nih leh nih loh hriat chian loh avânga phûr lo tak leh inthlahdah taka rawng lo bâwl thîn i ni em?.

Tûn atang chuan vâna hming ziak, vân member i ni tih inhriain i nun leh i hun zawng zawng kha Krista ram zauh nâna i hman theih nân Pathianin mal sâwm che rawh se. Amên.