“ Tin, an hnênah,” Khawvêl zawng zawngah kal ula, thilsiam zawng zawng hnênah chanchin tha hi hril rawh u”. (Marka 16:15)

        Chanchin tha hril hi Isua Krista vana a lawn dawna a thuchah hnuhnung ber a ni a, kan ngaih pawimawh a tul tak zet a ni. Chuvangin, keini amah ringtute chuan chanchin tha hril hi kan tih tur leh mawhphurhna a ni. Lal Isua khawvêla a lo kal chhan ber pawh boralte chhandam turin a ni. Chu boral turte hnena chanchin tha hril chu Lalpa’n nang leh keia kutah a dah a ni. 

Chu chanchin tha chu engtin nge kan hril tak ang le? 

      Kawng hrang hrang a awm thei ang; vawiinah chuan Bible Society rawngbawlna hi kan thlurbing dawn a ni. 

            Chanchin tha kan hril theihna zau ber chu “BIBLE SOCIETY” hi a ni, ti ila kan sawi sual awm lo ve. 

Bible Society chu eng nge ni? Eng hna nge an thawh? 

         Bible Society chu mi zawng zawngin Pathian thu chhiar tur an neih theihna tur leh mahni tawnga Bible kan/an neih theihna tura thawktu leh Bible thlen theih lohna rama Pathian thu an chhiar theihna tura Bible Track te buatsaihtu pawl an ni. 

        Nang leh kei ngei pawhin mahni tawnga Bible chhiar tur kan lo neih theihna chhan ber chu Bible Society vang leh, Bible Society-in hna an thawh theihna tura sum leh pai phal taka thawhtu ringtu hmasate thawh rah a ni. Chuvangin nang leh kei pawh Bible la nei lo leh Chanchin tha la hre loten chanchin tha an lo hriat ve theihna tur leh, Bible an lo neih ve theihna turin Bible Society-ah hian kan sum leh pai phal taka kan pek ve a pawimawh tak zet a ni. 

        

        Bible lehlin / neih dan tlangpui tarlang ila : 

KHAWVELAH :

Tawng zawng zawng - 7378 vel 

Bible lehlin zat - 717 

New Testament - 1582 

Portion & Selection - 1196 


INDIA RAMAH :

Tawng zawng zawng - 1652 vel 

Bible nei zat - 74 

New Testament - 92 


AIZAWL AUXILIARY :

Tawng zawng zawng - 33 

Bible nei zawng zawng - 16 

Bible pum ni lo - 22 

Bible la neih lo - 9 


        Mi tam tak chuan Lalpa rawngbawlin mahni hrehawm pawh pawisa lovin Missionary hna thawkin hmun hrang hrangah an kal chhuak a. Thenkhat chuan Missionary-te rawngbawlna atan an sum leh paite an pe a, thenkhatin mahni phak tawkin Missionary Sponsorship te an pe a, thenkhatin Bible Society kaltlangin thahnemngai takin an sum leh pai an pe bawk a ni. Heng zingah hian tel vena kan nei em le? 

        Khawvel zawng zawnga kal a, chanchin tha hril hna thawk turin kan Lalpa chuan min chah a ni a; Isua Krista thuchah hnuhnung ber tihhlawhtlin chu i duh em? Nang leh kei chu kan kal chhuak thei lo pawh a ni mai thei, sponsorship tam tak kan pe thei lo a ni mahna; mahse, mi zawng zawng leh nang leh kei pawhin kan tih theih tur pakhat a awm - chu chu Bible Society kaltlangin “Gospel A day” - ni khatah cheng khat pein chanchin tha kan hril thei a ni. Chu Bible Society-ah chuan heng rawngbawlna tur chi hrang hrang - Patron, Life Member, Junior Member, Bible Missionary, Annivesary leh adangte a tih thei bawk a ni. 

        Cheng khat chauh hmanga Lalpa rawng kan bawl thei tur hi kan vannei hle a ni! Sum tak tam hmang chauh emaw, kal chhuah chauhva rawngbawl tur ni ta se la, engtin nge rawng kan bawl ve tak ang aw? Pathianin malsawmna tam tak min pek atanga a tam zawk pawh ni lo, a chanve pawh ni chuang lo, cheng khat (Rs. 1) te chauh hmanga Lalpa’n ama rawngbawl min phalsak ve hi a va ropui tak em! I cheng khat chauh kha thlarau bo chhanchhuah nan lo hmang ve rawh le. 

        Ti hian ngaituah ila, tunlai khawvêlah hian cheng khat chauh chuan mamawh eng vak mah a lei theih tawh lo va, kuhva khawr khat tak ngial pawh a lei theih loh a ni. Engah vak maha kan hman tangkai loh chu Lalpa ropui nan leh thlarau bo chhandam nan tangkai takin i hmang thei asin. 

        A nih leh cheng khat chuan engtin nge rawng kan bawl ang? 

          E le, Bible Society Collector te kaltlangin nikhatah cheng khat (Rs.1) pein, kum khat chhung atan Rs.365/- pein rawng a bawl theih asin. 

          A nih leh engtin nge kan pek dan tur ni ang? 

             Kan remchan dan ang zelin thla tin emaw, vawi khata pek tlak emaw, kan remchan dan ang zelin collector-te hnenah hrilh hria ila, an lo lam mai dawn a ni. 

        India Rupee Cheng khat hmangin sulrul leh tuiekin a ei chhiat lohna, rukruten an reh pawh lohnaah vana rote lo khawlkhawm ve rawh le. I Cheng khat hmang khan mahni awmhmun atangin thlarau boral tur tam tak lo chhanchhuak ve rawh le. Kohhran member zawng zawngte he rawngbawlnaa tel theuh turin kan Lalpa Isua Krista hmingin kan insawm a ni. 

“I sumin Lalpa chawimawi la, i thil lo pung hmasa ber zawng zawngte nen “(Thufingte 3:9) 

LALPAN a thu malsawm rawh se…. AMEN