“I nun kaltlang chauhvin thu i hril thei a ni. Nuna lang chhuak zawnga Chanchin Tha hrilna aia Chanchin Tha hrilna tha leh dik kawng dang a awm lo” 

- Mahatma Gandhi


Dikna leh rinawmna kan vawng nung fo tur a ni. (Mika 6:8):

       Ringtute tan chuan biak in hi kan rinna kan tihchakna hmun a ni a, kan hnawthawhna/eizawnna hmun hi kan rawngbawlna hmun a ni. Hemi hre reng chung hian keini ringtute chuan kan hnathawhna/eizawnna hmuna dik lo taka eiruk mai te, thamna lak mai te emaw, Pathian duh loh zawng a ni tih hre reng chunga thil dik lo tih te hi chin hauh loh tur a ni. Kan Pathian hi mi ngaidamtu Pathian a ni a, kan hriat loh lai leh kan at laia kan thil tihsualte min ngaidamtu a ni, chutih rual chuan hre reng chunga thil kan tisual a nih erawh chuan Pathian thikthuchhia a ni thung a ni tih i hre nawn leh theuh ang u. 

 

Mi chapo te, rinawm lo te, dawthei te hi Pathian huat zawng tak an ni (Thuf 6:16-19):

           ‘Huatna’ tih tawngkam hi kan Pathian mizia nen chuan thil inhmeh lo tak a ni a tih theih awm e; amaherawhchu, kan Bible chuan Pathian thil huat zawng pasarih min hrilh tlat mai a, chung zingah chuan; Chapote : thil engkima midangte aia hria leh thiam zawka inngaia midangte hmusit thin te, Lei daw theite : mahni hamthatna tur a nih chuan dawt sawi mai hreh hauh lo te, thil tha lo suangtuah thin thinlungte : mi dangte chunga rilru chhia pu tlata an chhiatna tura ruahmanna siam thin te, Inrem lohna duhtute: midangte bula thu dik lo theh darh avanga mite inkara harsatna leh inrem lohna siam ching te hi an ni. Ringtute chuan kan hnathawhna/eizawnna hmunah Hengte hi Pathian huat zawng a ni tih i hre reng ang u.


Midangte mit hmuhah thil tha kan tih a, dik tak leh rinawm taka hna kan thawh chuan Pathian kan chawimawi tihna a ni. (Mat 5:16):

Pathian ringtute chu kan hnathawhna/eizawnna hmunah kan danglam bik tur a ni, danglamna han tih hian a hnawksak zawng leh midangte tana harsatna siamsak zawnga danglamna lam a kawk lo.

            ISUA KRISTA khan ringtu kan nihna hi mi zawng zawng mit hmuha lantir turin min ti a, Matthaia 5:14-16 kan chhiar chuan  - ”Khawvel eng in ni e. Tlangchhipa khaw awm chu thuhruk theih a ni lo. Miin khawnvar halin hrai hnuaiah an dah ngai lo, a dahnaah an dah zawk thin; tichuan, in chhunga mi zawng zawng a en thin. Chutiang bawkin in eng chu mi mithmuhin eng rawh se; chutichuan, in thiltih thatte an hmu ang a, in Pa vana mi an chawimawi thei ang” tih kan hmu a ni.

           Police-te chu uniform an hak atangin police an ni tih kan hre thei mai thin, chutiang bawkin sikul naupang pawh a school uniform inbel atangin a sikul luhna kan hre thei mai bawk a ni. Ringtute erawh chu kan thawmhnaw inbel emaw kan thil neihte emaw kan hnathawh/eizawnna atang chuan ringtu kan nihna a lang thei hauh lovang; kan chetzia te, midang bula kan khawsak dan te, kan rilru put hmang te leh kan thawhpuite hmangaihna kawngah te Ringtu kan nihna/ kan danglamna kan lanchhuahtir hian kan Pathian chu chawimawiin a lo awm dawn a ni.

        Kan hnathawhna/eizawnna hmuna Pathian kan chawimawi theihna tur chuan dik taka engkim kan tih a, inngaitlawm leh thuhnuairawlh taka thil tha midangte tan kan tihsak thin a ngai a ni. Mahni inchawimawi nan leh miten min fak kan duh avang hian thil tha tam tak pawh a tih ve theih tho awm e. Keini Pathian ringtute chuan engkim kan tih hi Pathian ropuina leh chawimawina atan tih kan tum zawk tur a ni. Chu chu Pathian lawm zawng leh Pathian malsawmna dawng thintute nun dan tur pawh a ni.