(Numbers 11:24-30/ Exodus 19:1-6/Deuteronomy 7:6-11/I Korinth 12:12-27/Rom 12:1-13)

“Chutichuan, nangniho hi Krista taksa chu in ni a, a pengte in ni theuh bawk a.” I Korinth 12:27

            Thawnthu pakhatah chuan Isua vana a lawn chhoh hnuah khan Vantirhkoh Gabriel-a chuan Isua hnenah chuan, “Khai le, tunah chuan khawvela i hna thawh chu i zo ta a, engtinnge i hnathawhho kha a thamral mai loh nan ruahmanna i siam tak le?” tiin a lo zawt a. Isua chuan, “Ka zirtirte – Petera te, Johana te, Jakoba te leh midang engemaw zat ka hnutchhiah a; chungho chu ka Kohhran te an ni,” tiin a chhang a. Gabriela chuan, “An niho chu lehkhathiam lo leh mimawl tak tak an ni si a..” a ti  leh a. Isua chuan, “Ka Thlarau ka pe alawm,” a ti a. Gabriela chuan, “A nih leh I zirtirte chu lo hlawhchham ta ang se la, engtin nge ni zel ang?” tiin a zawt zui leh a. Isua chuan, “Chubak chu tihngaihna dang a awm tawh lo,” tiin a chhang a ni an ti a.

            Ni e, Kohhranho lo chu he khawvela Isua hnathawh chhunzawm tur tumah an awm lo reng a ni. He khawlvela Isua a len lai khan hmuhtheih taksa (physical body)  neiin rawng a bawl a; mahse tunah chuan vanah a awm ta a, chutichuan a hnathawh chhunzawm turin a  Thlarau chu a Kohhrante hnenah min pe ta a ni.

A taksa (Kohhran) chuan eng hna nge a thawh tak ang?

1.      Taksa chuan mihring mizia/nihna a lantir: Mihring chu a lo hlim chuan a hmel-ah lo lang chhuakin, a nui mawi tak chuan a hmelte pawh a lo titha ta vek a, mahse thinrimna chuan kan hmel a tidur vek a, kan hmelchhe ve tak hi en tlak lohvah kan chantir mai thin. Mi tha tluang takho hi an zaidamna leh an hlim hmelte hian min hip thin a nih hi.

Ephesi 1:23 ah khan Paula chuan, “Kohhranho chu a taksa a ni, engkim engkima tikhattu famkimna chu,” (“Church is Christ’s body and as such holds within it the fullness of him who himself receives the entire fullness of God”- New English Bible) tiin a sawi a. Chutichuan Kohhranho chu Isua mizia leh nihna dik tak he khawvelah hian pho lang tura Koh-hran/serh hran a lo ni ta a nih chu. Mahse Kohhran members ho hi mimawl leh midangte tana itawm loh tak tak, thiamna, finna leh hauhsakna lamah lah pachhe tak tak te kan ni bawk si. Paula chuan Korinth mite hnenah hetiang hian a lo sawi daih tawh a, “Unaute u, a kohna che u hi ngaihtuah teh u, tisa lama mi fing tam tak te, mi chak tam tak te, mi tha tam tak te koh an nih lohzia hi..” IKor. 1:26 tiin. Chuti a lo nih takah chuan Isua Krista hmel leh mizia chu Kohhrante hian kan lantir ve zel tur a lo ni. Thingtlang khaw pakhata Kristiana inlet ho chu an mahni ruai thintu, Landlord Sudra chuan an hmel leh nungchang danglamzia chu a hmuh hmaih hauh lo va. Mak ti em emin, “Heng mite hi kan hrechiang a, an pi leh pu atangin kan pi leh pute hna lo thawk tawh thin, tun thlenga kan hna la thawk chhunzawm zel an ni a; nimahse an hmel leh an khawsa zia atang hian engemaw thil tha tak chu an hmu a ni,” tiin a sawi chhuak hial an ti. Kohhran chuan Isua hmel leh mizia thatna chu a pholang ve tur a ni.

Kan Kohhranah hian hei hi a dik ve ang em le?

2.      Taksa chuan mihring duhthlanna leh tumna a hlenchhuah tir thin: Khawiah emaw kal kan duh chuan kan ke-in kan duhna hmun min hruai thleng thin a; hna kan thawh duh chuan kan kut kan hmang thin. Kan mit hmangin kan thil hmuh duh kan hmu a, kan bengin kan thil hriat duh te kan hre thei thin. Kum tam tak kal taah khan Isua Krista chu tisain he khawvelah a lo kal a, mihringin an mamawh chu a mit ngeiin a hmuhsak a, an mamawh a hnena an thlente a bengin a hriatsak a, an natna tawrhte a tisa thinlungin a hriatpui a, a ka chuan an mahni thlamuanna thute a chhakchhuak a, a thlamuan thin a, an mamawh angin an tan a kal a, a ban te chu anmahni tidam turin a phar chhuak thin. Tunah erawh chuan tisain kan hnenah a awm tawh lova. Chuvangin kan mit te, kan beng te, kan ke te, kan thinlung te chu a hman a lo ngai ta a ni. Engtin nge kan kain a thu kan sawi lohvin miten a thu chu an lo hriat theih tak ang? Kan kein min tirhna hmunah min thlen loh chuan engtin nge a hnathawh chhunzawm tur chu kan thawh theih ang a, a hmangaih mihring te, tanpui ngai ngawih ngawih te chu engtin nge kan tanpui theih tak ang?

3.      Taksa chuan na a tuar thin:    Kalvari Krawsah khan Isua Krista chuan mihringte sualna chu a lo phur a. Paula erawh chuan, “Krista hnenah khenbehin ka awm ta..” Gal. 2:20 tiin a sawi daih mai a ni. Kolosa 1:24 ah chuan, “Tuna ka tuarsakna che u ah hian ka lawm a, Krista hrehawm tuar bak chu a taksa avangin ka tisaah hian ka chhunzawm zel a ni; a taksa chu kohhranho hi an ni,” tih kan hmu bawk a. Keini pawh hi a TAKSA, KOHHRAN member zinga mi kan nih angin a tuarnaa tuar ve tur leh ama tana tuar ve turin koh kan ni a, chutichuan midangte chhandama an lo awm ve theih nan kan lo tanpui ve thei ang, Krawsah a lo hlen vek tawh si a.

Lalpa zanriah kan kil thin hi kan ngaihtuah ngun a ngai viau a ni. Lalpa zanriahah hian Lalpa taksa kan tana pek chu kan hre reng thin a. Isua nen pumkhata kan awm theihna tur kan ngaihtuah thin. He tah hian a tuarna avangin thil pahnih kan dawng a - a tuarna avanga malsawmna leh a tuarna tawmpui ve tura inpumpekna te an ni. Chutiang a nih loh chuan, tihdan phung pangai mai mai, awmze nei lo Sacrament kil ve satliah mai mai a ni ang. Mahse a tuarna tawmpui ve tur leh amaha kan inpumpek a nih chauhvin he Zanriah hi kan ei tur a ni. A taksa (Kohhran) zinga mi kan ni si a. “A ei leh a intu chuan Lalpa taksa chu khun taka a ngaihtuah si loh chuan mahni chunga rorelna turin a eiin a in thin a ni si a,” I Kor. 11:29 tih kan hmu a ni.

Hei hi a ni Kohhran chu Isua Krista taksa a ni an tih thinna tak chu, chutah chuan keini pawh member kan ni ve ngei a. Chutichuan Isua Krista hmel mawina leh thatna zawng zawng tarlang turin a KE kan ni a, a hnathawh chhunzawm a, midangte tana malsawmna a lo thlen theih nan eng pawh tuar huam tur kan lo ni reng mai.

Kan hnenah Thlarau Thianghlim chu lo awm zel se la, chutichuan he khawvela a Kohhran zawng zawngte hi a TAKSA kan lo ni thei ang a, tu te pawh hi a taksa kan lo ni tak zet ang.

Amen.