“He khawvel dan ang hian awm suh ula; Pathian duhzawng, a tha leh lawm tlak leh, that famkim chu

in hriatfiah theih nan, in rilru a thara awmin lo danglam zawk tawh rawh u.” (Rom 12:2)


He thu pawimawh tak mai, “Nun Danglamna” (Nun inthlak thleng) hi a pawimawh ang leh Kristian nuna hmuh ngei ngei tura beisei a nih lai hian tunlai Kristian te hian kan hlamchhiah deuh a ang ta viau a. Krista zuitu kan nih chuan he nun hi keimahni ah hian a a lang ngei tur a ni.

Hmanlai thawnthu-ah te nun inthlak danglam thut kan hre thin a. Pa thinchhe tawp thanga an sawi, Thangzachhinga kha, a nun a inthlak danglam nasa hle mai. Pa thinchhe lutuk mai chu pa nunnem leh zaidam lutuk mai a lo ni ta a. Tun thlenga Mizo thawnthuah “Vana Pa” tih sawi apianga kan rilrua lo awm chu a zaidam leh nunnemna kha a ni fo thin. Tin, Hlawndawhthanga te unau khan Khiang thing kawrawng chhunga tui tling an in avang khan keimi (Sakei) ah an lo chang ta hlawm a. Heng lo pawh hi hetiang nun/nihna inthlak thawnthu hi kan hre nualin a rinawm.

 Thawnthuah chauh ni lovin a takah hian nun danglamna hi a thleng ve thei ang em?

 Pathian thu chuan kan nun hi thuam tha satliah mai lovin nun inthlak danglam hi kan mamawh zawk a nih zia min zirtir a tum a. Nun thuam that mai emaw han her rem hlek hian kan nuna buaina hi a chingfel lo a ni. Lal Davida chuan “Aw Pathian, Keimahah hian thinlung thianghlim tak siam la...” (Sam 51:10) a ti a. Pathian chuan, “Thinlung thar ka pe ang che u...” (Ezekiela 36:26) a ti bawk a.

 Nikodema mifel leh Sakhaw mi tak pawh kha Lal Isuan a mamawh dik tak a lo hrilh a. “I piang thar tur a ni,” a lo ti a. A nu pum chhunga lut a,piang nawn leh turin a ti lova. Lal Isuan a sawi tum tak chu Thlarau lam piannawnna chungchang a ni. Nikodema khan a nun hlui kha paih sela, Krista-ah a nun tharin nung tawh se tih Lal Isuan khan a duh a ni.

II Kor. 5:17 ah chuan nun danglamna chungchang kan hmu leh a. “Mi tupawh Kristaa awm chu thilsiam thar a lo ni a, thil hlui chu a ral a, a thar a lo awm ta a ni...” Mihring nunah danglamna kan hmu a nih chuan a nundan hmasa chu a thar hlaka thlak thleng a ni tihna a ni. Tirhkoh Paula’n helai hmuna danglam a tih hi “Pathian chakna hmanga thlak danglam” a tihna a ni.

Buhchium atanga Phengphehlep a rawn chhuah hian buhchium kawr chu a lo keh a, a nihna zawng zawng a hloh vek hnu leh a kawr chuan nunna a pawm dan leh kan hrilhfiah dan te hi chhut ngun a ngai ta viau lo maw? Kan duhdan leh nuamsa taka kan pawm theih turin Pathian thu te hi kan hrilhfiah kual ta mai mai a ang ta viau mai. Mahse kan Pathian thu hi khawvel awm tirh ata a la ngai reng a. Ziaka min dahsaktu ten Pathian Thlarau kaihhruainaa an buatsaih lai ata tawh he kan Pathian lehkhabuin min zirtir hi kawng awlsam leh nuam a ni fo lo. Pathian thu chu a nih anga kan zawm mai a ngai thin.

Nun danglamna chu nun hlui kalsan vek a, Krista nun thara inthuam a ni.

Luka 5:8-11 ah khan Petera nun danglamna kan hmu a. Misual a nihzia a inhmu chiang hle a. Bawkkhupin Isua ke bul a thlen meuh chuan, engkim kalsanin, a thihni thlenga phat tawh lo tur leh Kraws-ah a letling zawnga khenbeh thlengin a zui ta a ni tih kan hmu a nih kha. Pathian Thianghlimnaah chuan miin a sualna a hmu fiah a. A thatna lai ber pawh pawnchhe hnangkhai ang lek a nihzia a hmuchiang thin. Chutah chuan a nun sual leh tenawm kalsan vekin Pathian thianghlimna ang chhunga lut ve turin a nun a buatsaih ta thin. A nu emaw, a pa emaw, a thiante emaw khan sual sim an mamawhna hmu lovin, AMAH ngeiin a sual sim a mamawhzia a inhmu chiang thin.

 Zawlnei Isaia kha Temple-a a tawngtai laiin Pathian hmel a hmuh khan A thianghlimna leh ropuinaah khan Isaia chuan hmui bawlhhlawh pu mi a nihzia kha a inhrechhuak nghal vat a. Misual a nihzia a inhrechiang hle a. A hmui bawlhhlawh chu Vantirhkohvin meiling hmangin a dep fai ta a nih kha.

 Lal Isua tehkhinthu sawiah khan mi in anglo pahnih, Sakhawmi Pharisai leh misual, chhiahkhawntu tawngtaina thu chham kha kan en chuan, chhiahkhawntu zawk khan thiam a chang ta daih tih kan hmu a. Pathian in mahni inphat a, Amah beltu nun danglamte a pawm thin. Thiam a chantir zawk thin.

 Nun danglamna chu Sual sima, Krista nun thar tawm tura Krista Baptisma chan hi a ni

 Pentecost ni ah khan Petera’n mipui pungkhawm ho zingah thu a sawi khan an thinlung kha vih angin a na hlawm a. Enge an tih tur tia Petera an zawh khan a ni chuan, “Sim ula, in sualte ngaihdam nan Isua Krista hmingin baptisma chang rawh u,” a ti a ni.

 Tunlai kan rama Kristian nun hi chhut ngun deuh ang u. Hmelma pa duhdan anga nung reng chung leh Diabola huang chhunga tang reng chung hian LAL rawng hi a bawl tak tak theih loh. Kan buhchium kawr hi tawn keh ila, min phuartu sual thiltihtheihna chu Isua chakna hmanga hnehin, ropuina I puang chhuak ang u. Kan nun danglamna chu midangte hriat theih ni rawh se. Tlang chunga khaw awm a lang fiah thin a. Khawnvar hi dawhkana dah a nih chuan pindan thim a en thin. Saula kha Tirhkoh Paula tiha koh a nih chhan kha a nunah danglamna a awm a ni. Kan rama Kristian ten kan mamawh em em Nun Danglamna dik nei turin kan nun buatsaih theuh ang u.

 Lalpan a thu malsawm rawh se. Amen.