Isaia 41:10-          Hlau suh u, kei in hnenah ka awm si a; mangang suh u, kei in Pathian ka ni si a: ka tichak ang che u a; a ni, ka tanpui ang che u; a ni, ka felna kut ding lamin ka chelh reng ang che u.

Joshua 1:3           Mosia hnena ka sawi tawh ang khan in kephaha in rah apiang chu ka pe vek ang che u.

Joshua 1:9           Thu ka pe che a ni lawm ni? Chak tak leh huai takin awm rawh; hlau suh la, zam hek suh: LALPA I Pathian chu i kalna apiangan i hnenah a awm zel dawn alawm,” tiin a sawi a.

John 14:27           “Thlamuanna ka hnutchhiah a che u; keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se.

            Pathian hian Amah ringtute hi hlau reng leh zam renga awm turin min duh hauh lova. Thlamuang leh zalen taka kan awm theih nan Bible ah hian thlamuanna thu engemawzat min hnutchhiah a. Chumai a la ni lova, huaisen leh chak taka a rawngbawl tur hian min la beisei zui zel a ni. Chutianga awm thei tur leh min beisei anga a rawng kan bawl theih nan hengte hi Amah ringtute chu min pe a ni:


i. Thlamuanna min pe:

‘Hlau suh u, kei in hnenah ka awm si a’

Pathian hian Amah ringtute chu thlamuang taka awm tura min duh lai hian thlamuanna hi kan tlachham hle thung a. Hei hi rinnaa kan neih tur anih lai hian rinna hi kan tlachham leh fo thin. Amah chu kan hnenah a awm reng dawn a ni tih kan rin loh vang nge kan theihnghilh thin vang nge, kan rin tawk loh vang te pawh a ni thei ang. Kan hnenah A awm reng dawn a ni tih min tiam avang hian Engkim chunga thunei leh Lal berin min awmpui reng dawn a ni tih hriatchianna/rinna a pawimawh hle a ni.

Johana 14:27 a kan hmuh angin he khawvel thlamuanna mai mai ang ni lo, Pathian hnen atang thlamuanna famkim chu hnutchhiahin kan awm a ni tih hriat reng a tul hle a ni. Kan thinlung hlauhna leh rinhlelhnaa khat thin hi paih bovin, he lai thu hi kan hriat reng a pawimawh hle a ni.

 

ii. Venhimna tha min pe:

‘Mangang suh u, kei in Pathian ka ni si a’ an

Mitam tak chuan mahni invenna atan hmanraw chihrang hrang kan dap khawm a. Kan khawsaknaah security tha kan neih theih nan Bank-ah sum tam tak dah thei tur te, in leh lo, lirthei leh hmanraw chihrang hrang lakhawm turin kan hman hlel a. Chung thil chuan kan rilru ti thlamuanga, tinghet thei turin kan ngai thin. Mahse chutiang ngah ho leh lakhawm ta ho apiang an hlimin an thlamuang thin tih kan hre ngai lo. An manganna a belhchhah mai zawk fo thin.

Security tha hi he khawvel mitkhap kara ral leh thei thilin min pek theih a ni lo tih a chiang hle a. Lei leh van siamtu, “Kei in Pathian ka ni” ti tu hnen atanga chhuak chauh lo chu security tluantling a awm lo. Philipi 4:19 “Tin, ka Pathian chuan Krista Isuaa a ropuina ngahzia ang zelin intlakchhamna tinreng pawh a phuhruksak ang che u.” tih kan hmu bawk a ni.


iii. Chakna min pe:

‘Ka tichak ang che u’

Pathian tana a rawng kan bawlna leh kan rinna kawngah hian Kristiante hi kan chak lo fo thin. Kan Pathian chuan kan phak ang tawk tur mawhphurhna leh rawngbawlna tur min ruatsak thin a. Mahse chung chu kan tihlawhchham fo thin.

Kan Pathian chuan Amah ringtute chu min tihchak a tiam a, chu chu ring nghet tlat chunga ke kan pen thin a pawimawh hle a ni. Tirhkoh Paula chuan Philipi mi te hnena lehkha a thawnah khan ‘Mi tichaktuah chuan engkim ka ti thei a ni’ tiin a sawi a nih kha.


iv. Tha hrui min pe:

‘Ka tanpui ang che u’

Pathian hian engkim hi min tihzawhsak vek min tiam hauh lova, nasa taka kan beih ve na hi min tanpuia, hlawhtling thei tura thahrui min pek a tiam chauh a ni. Mu reng chung leh ralkhat atanga thlir ringawt chunga kan hmabaka tihtur awm hi zo zung zung turin chakna thahrui hi min pe dawn hauh lova, kan beih ve phawt hi min phut tlat zawk a, chumi hnuah chiah chuan min tanpui dawn chauh a ni.

Isaia 41:13-ah khan “Kei LALPA in Pathian hian ‘Hlau suh u, ka tanpui dawn a che u,’ tiin, in kut ding lam chu ka chelh dawn si a.” tih kan hmu leh a. Zam lo leh hlau hauh lova kan ke kan pen chhuah zelnaah kan Pathian chuan kan hnehna hi min puansak zel dawn a ni. Joshua hnenah, “I rah chin apiang i ram..” a tih kha kan ringtu nunah hian a dikna kan hmu zel dawn a lo ni.


v. Nghet taka din theihna min pe:

‘Ka felna kut ding lamin ka chelh reng ang che u’

Kristian tam tak hi kan der depin kan chak lo hle thin. Keimahni chaknaah kan inghat a, kan thahrui hi kan hmachhuan ve thin. Mahse heng hian rei a daih ngai lova, a tlo lova, Setana’n rei loteah min keuh bet/min hneh thuai mai thin.

Pathian chuan a felna kut dinglama min chelh reng turin min tiam a. Min thlahthlam hauh dawn lo a ni tih he lai thu hian min hrilh a. Chumi hrechiang zel a, Amaha innghat ngam tur chuan kan tawngtai reng te, Amah kan rin tlat te leh A thu kan zawm tlat a tul a. Chumi bak zawng chu Pathian chuan engkim a ti vek tawh mai ang. Amah chu kan chakna hnar a ni si a.