Kumin 2022 hian Sunday School puitling zirlaiah ECM Thurin (Doctrine) tih kan hmanga a lawmawm hle mai. A belhchhahna ang deuha ziak tur chuan ka in sit deuh nain tul tlat nia ka hriat avangin kan Kohhran (New Siaha Local Church) bik pualin tihian ka han ziak chhuak a ni. He thuziak hi mahni irawm leh phuahchhuah ziak mai chia ka ngaih loh avangin ECM Constitution lehRawngbawlna Bu-te en chunga ziak a ni. ECM Kohhran hian thurin sawmpahnih (12) kan neia chungte chu a mal te te in kan chhiar chhuak anga, sawifiahna tawite in a tlang kan kawm dawn a ni.

ECM Kohhran Thurinte: 

Thurin I (Kohhran Chungchangah)

Kohhran chu Pathian pakhata minung pathum awm ring, Isua Krista rinna a vanga chhandamna changtute hlawm khata awmkhawm hi a hi. Pawl thianghlim a ni a, khawvel sualna ata intithianghlimin, nun leh rawngbawlnaah Pathian chu thupui bera dah tura koh chhuah a ni. Khawvel pum huap a nih avangin, ringtu hmuhtheih leh hmuh theih loh, hman amo leh tunlai a mite, khawvel hmun tina Kristiante a huamin, hnam leh vun rawng , mipa leh hmeichhia emaw, retheih leh hauhsak vangin emaw tumah a thliar lo a ni.

Pathianthu tlawh chhana ding a ni a, rinna leh thiltih pawh Bible a innghat tlat a ni. Tirhkohte zirtirnaa innghat a ni a, Kristan chanchintha khawvela puang tur leh a thu hriattirtu atan a tirh a nih angin a thawk thin. Heihi Pathian nung Kohhran, Krista taksa, Thlarauthianghlin In, ram tinah englai pawhin mithianghlimte awmkhawmna a ni.

(a)  Hmuhtheihloh Kohhran: RIngtu hmuh theih loh Kohhran chu ringtu dik, hmanah leh tunah leh lola awm tur zawng zawngah, Krista hnuaiah pumkhata a hruai khawmte an ni. Krista chu lu a ni a, Krista mo, a hrin (a taksa), thil engkim tifamkimtu famkimna a ni. Thlarauthianghlimin a tihthianghlim, Kristan a ropuina a Kohhran sawiselbo, ropui leh hnehtu, nikin ni a a hlan tur chu a ni.

(b)  Hmuh theih Kohhran: Hmuhtheih Kohhran chu Kristian thurin pawm, ringtute leh an fate awmna Kohhran chu a ni. He hmuhtheih Kohhran hian Pathianthu puan hi a hna a ni a, Lalpa zanriah zahawm/ uluk taka buatsaihin, dan leh thununna/zilhhaunata a kengkawh tlat a ni.

 

Thurin II (Bible Chungchangah)

Thuthlung hlui leh Thuthlung thar hi Pathian thu a ni a, hei chauh hi rinna leh thiltih tehna diklo theilo (infallable) a ni.

Thurin III (Pathian Chungchangah)

Pathian pakhat chauh a awma, amah chauh chu biak tura a ni. Ani chu thlarau, ama thua lo awm, hmuntina awm, thlarau dang zawng zawng leh thildang zawng zawgn aia/laka danglam a ni. A nihphungahte, finnaah te, thuneihnaahte, thianghlimnaahte, diknaahte, thatnaahte, hmangaihnaahte tawpna neilo, chatuana minung, danglam ngailo a ni.

Thurin IV (Trinity Chungchangah)

Pathianah hian minung pathum; Pa, Fapa leh Thlarauthianghlim an awm a, an pathumin Pathian pakhat, nihna thuhmun, thiltihtheihna lah ropuinaa intluk an ni.

Thurin V (Thilsiam Chungchangah)

Lei leh van leh a chhunga thil awm zawng zawng siamtu Pathian chuan mihring hi hriatna, felna leh thianghlimnaah amah anpuiin mipa leh hmeichhia a siam a, mi zawng zawng hi bul hmunkhat leh chhungkua, unau anga inzawm theuh kan ni.

Thurin VI (Sawrkar Chungchangah)

Mihirngte hi hmunkhata inrem tak khawsak tlan theihna turin ram rorelna, sawrkar hi Pathian ruat a ni. Chuvangin roreltute tan kan tawngtai thin tur a ni. Pathianthu nen a inkalh loh chuan an thu pawh kan zawm tur a ni. Sakhua chungchangah sawrkarin thu a nei tur a ni lova, a inrawlh turah kan ngailo. Kohhran erawh chuan ram rorelna tha a awm theih nan engemaw chen chu mawhphurhna neiveah kan inngai.

Thurin VII (Isua: Pathian leh mihring nihna Chungchangah)

Mihring chuan a ma duhthlanna ngeiin Pathian dan chu a bawhchhia a, thiamlohna leh chhiatnaah a tlu lut ta a, chu thiamlohna leh chhiatna leh sualna hremna ata chu anmahni chhanchhuaka tur leh, chatuan nunna pe leh turin, hmangaihna tawp neilo Pathian chuan A Fapa mal neihchhun Lal Isua Krista chu khawvelah a rawn tir a, Ama zarah chauh mihringte hi chhandamin kan awm thei a ni. Chu chatuan Fapa chu mihring (tak tak) ah alo changa, mihring nung pakhat, minung nihna pahnih nei, chatuan Pathian tak tak leh mihring tak tak a ni. Thlarauthianghlim thiltihtheihnain Marin a hringa, sualna a neilo. Misualte tan Pathian dan chu a zawm kima, Pathianin dikna aphut chu tizo tur leh mihringte Pathian nen inrem tura inthawina hlen famkim nan a inhlan a, Krossah a thi a, phumin a awm a, nithum niahmitthi zing ata a tho leh a, Pthian dinglamah a han thu ta a; chutah chuan mite tan sual thupha chawi turin a awm a, chuta tang chuan mitthite kaitho tur leh khawvela rorel turin a lo kal leh ang.

Thurin VIII (Thlarau Thianghlim Chungchangah)

Thlarau Thianghlim, Pa leh Fapa atanga lo chhuak chuan mihringte chu a chhandamna changtuah a siam a, an sual zia leh an chungpik zia a hriat chian tir a ni. Krista hriatna kawngah an thinlung a ti eng a, an duhthlanna a tiharh a, Isua Krista chu an Lal leh Chhandamtuah pawm turin a buatsaih a, a pui bawk a, anmahniah felna rah tha tinrengin a thawk thin a ni.

Thurin IX (Chhandam nihna Chungchangah)

Pathianin mihring zawng zawng henah a thlawnin chhandamna a pe a, an sualnate sim tur leh Lal Isua Krista chu an chhandamtu atana ring turte, Amah entawna, Pathian duhzawnga in ngaitlawm a thianghlim taka nung turin thu a pe a, Krista chu Ringa a thupek zawmtute chu chhamdam an ni a, sual ngaihdamna te, thiam chantirna te, chatuan ropuinate an chang a ni. Ringtute chuan tun damchhungah pawh chhandam nih inhriatchianna lawmawm tak chu an nei thei a, Thlarau Thianghlim chuan khawngaihna hna a thawh laiin thute, hlate, Sacrament te leh tawngtainate hi a hmang deuh ber a ni. Mihringte chhandam tur leh chatuan nunna pe turin hmangaihna tawp neilo Pathian chuan a chatuan Fapa neih chhun Lal Isua Krista chu khawvelah a rawn tir a; Ama zarah chauh chuan mihringte hi chhandamin an awm thei a ni. Chu chatuan Fapa chu mihring takah alo chang a, minung pakhat mize pahnih nei, Pathian tak leh mihring tak a ni kumkhua ta a ni. Thlarau Thianghlim thiltihtheihna avangin nula thianghlim Mari chuan a paia, a hring a; mahse, sual a neilo. Misualte tan Pathian dan chu a zawm famkim a an tan a inhlan a, Krosah a thi a, phumin a awm a, nithum niah mitthi zing ata a tho leh a, Pathian dinglamah a han chho a, tahchuan a mite tan a dil sak reng a, chuta tang chuan mitthite kaitho tur leh khawvel rorel turin alo kal leh ang.

Thurin X (Sacrament Chungchangah)

Krista buatsaih (siam) Sacrament te chu Baptisma leh Lalpa zanriah te hi an ni. Baptisma hi Pa leh Fapa leh Thlarau Thianghlim hminga tuia hnim phum hi a ni. Hei hi Krista nen kan inzawmna, Pathian thlarau zara piantharnate leh tihnunna, chhinchhiahna leh nemnghehna a ni a; Lalpa hnena kan inhlanna a ni a, thiltih a ni bawk. An sualnate sim a, Krista chu Lal leh Chhandamtu atan an ring tih puangtute chauh Baptisma hi chantir tur a ni.

Lalpa zanriah chu Krista thihna hriatreng nana chhang leh Uaiin ei hi a ni a, ringtuten Krista thihnaah hlawkna an chan chhinchhiahna leh nemnghehna a ni. Amite chuan Amah nena inhlanna an puan dante, an hlawkpui dan te, Ama rangbawl tura an inpek zelzia te, Amah an pawlna leh midangte an pawlna entir nan, alo kal leh hma loh chu an ti thin tur a ni. Sacrament hlawkna chu Krista malsawmna  zarah rinnaa changtuteah Thlarauvin hna a thawk vanga awm a ni.

Thurin XI (Ringtute tih tur Chungchangah)

Ringtu zang zangte tih tur chu Kohhran rawngbawlnaa tel te, Krista Sacrament leh thil serh dangte tha taka zawm te, a dan zawm te, tawngtai te, Lalpa NI thinghlim tak serh te, amah be tura inkhawm te, a thu tha taka ngaihthlak te, Pathian malsawmna an dawn ang zia zela lawm tka pek let zel te, anmahni leh mi zang zawng zinga Krista nungchang lantirte, khawvel ram tina Pathian ram zauna tura thawh te, ropui taka a lo kal lehna nghahte hi a ni.

Thurin XII (Hun hnuhnung Chungchangah)

Ni hnuhnungah chuan mitthite chu kaihthawh an ni ang a, mitin Krista rorelna thutphah hmaah an ding ang a, an damchhunga an thil tih that leh that loh dan angin rorelsak an ni ang. Ringlo mite leh misualte chu thiamloh changin, an sual vanga hremna chu an chang ang. Krista ringa a thu zawmtute erawh chu thiam chan tir an ni ang a, chatuan ropuinaah an lut ang.

Sawizuina

Evangelical Church of Marland hian Apostle thurin te, Nicea thurinte, leh Wesminster Thurinte chu Pathian thu hrilfiah leh zirna atan tha leh dik tawkah a ngai a, tin, tuna kan tarlan tak Thurinte khi khawvela protestant Kohhran tam zawkin an pawm dan tlangpui pawh a ni bawk tih kan hriat a tha awm e.

Thurin pakhatnaah Kohhran chu Pathianin Lal Isua hmanga a phun, Lungpui Isua a innghat, huapzo a ni a, he Kohhran hi Lal Isua taksa, Thlarau thianghlim in a nih a puang chhuakin a pawm a ni. Kohhran chu hmuhtheih leh hmuh theih loh a awm a, hmuhtheih Kohhran hi Hmuhtheih loh Kohhranah a inthlungkhawm a ni tih a lang a ni.

Thurin Pahnihna hian chiang takin Bible hi thianghlim leh tehna chungnung ber, diklo theilo ani tih a puangin a ti lang bawk.

Thurin Pathuamnah chuan Pathian pakhat chauh hmun tina awm engkim tithei, engkim bul leh engkim tawpna a nih zia kan hmu. Thurin palina chuan chu Pathian Pakhatah chuan mining pathum an awm a, an zain nihna leh thiltihtheihnaah thuhmun an ni tih puangin a ti lang a ni.

Thurin Pangana leh parukna te hian khawvela thilsiam leh Sorkar chunga Kohnran pawm dan a rawn sawi a: engkim siamtu Pathian a ni a, mi zawng zawng hi bul thuhmun kan nih angin in zah tawn a pawimawh zia a lang bawk. Khawvela Sorkar  hi Pathian ruat niin a thu pawh zawm tur a nih laiin Sorkar khalh ngil tur erawh chuan Kohhranin mawhphurhna kan nei tih kan hmu bawk.

Thurin pasarihna hian Isua chu mihring dik tak leh Pathian dik tak ni chunga mihringte chhandamna tura nun pein; thi a tho lehin chatuan nunna min siamsaktu a nih thu kan hmu a ni.

Turin pariatna chuan Thlarau thianghlim chu Pa leh Fapa atanga lo chhuak, ringtute puitu, ti engtu leh sual nihna hriat tirtua nihna awpmin a puang chhuak ani.

Thurin pakuanah chuan mihringte hian mahniin chhandamna kan chang thei lova Lal Isua Krista rinna avanga khawngaihna a chhandam kanihna pawmin a puang chhuak a, Krista ringtute chu sual ngaihdamna changin thiam chantir kan ni a, Isua zara ropuina changtute kan nih zia ti langin a pawm a ni.

Thurin sawmna chuan Sacrament pahnih Baptisma leh Lalpa zanriah hi Amah Lal Isua Krista siam leh hman ngei anih avangin thil serh bikah a pawmin a puangchhuak ani tih kan hrethei a ni.

Thurin sawmpakhatna ah chuan ringtute tih tur kanhmu. Ringtu chuan lalpa ni serh leh Kohhran dante zawma Lal Isua Krista rma tizau tura mahni leh thil pek te nen pawha tang tur kan nihzia pawmin min hriattir a ni.

Thurin sawmpahnihna chuan hun hnuhnungah mitthite kaihthawha an awm tur leh Isua chu he leiah hian Rorel tura alo kal leh ngei tur thu pawnin a puangin a tinghet bawk ani.

Tlangkawmna.

Kohhran thurinte hi kan rinna tingheta kan hriatchian theih nan kan in zirtira mahningei pawhin hrechiang tura kan zir ngun a pawimawh hle a ni. Heng kan Kohhran thurin leh pawm dan kan tarlante hi famkim taka hrilhfiahna ziak chhuah a har deuh anih pawhin, chhiar ngun ila Lalpa Thlarau puina in kan hriatfiah ngei ka ring a ni. Tichuan, vanahte kal tlang tawh Puithiam Lalber ropui tak, Isua, Pathian Fapa chu kan neih avangin kan thurin hi i pawm tlat ang u(Hebrai 4:14).