Krista rilru tih hi hun rei tak atanga ka rilrua lo awm reng tawh thin a ni a, han sawifiah vak dan tur lah chu a vang ang reng viau mai bawk si a. Bible atanga kan hmuh theih ang angte sawiin zirho kan tum dawn a ni.


1. A hmasa berah chuan boralte zawnga chhandam hi Krista rilru a ni. Bawhchhiatna avanga Pathian nena in mihran tawh, Pathian hnen ata tlanbo ta te chhandam a, chatuan nun neihtir hi khawvela a lo kal chhan a ni. Chu hna chu Amah ringtute pawhin kan thawh chhunzawm a ngai a, chu hna thawk tura thupek kan ni.

“Khawvel zawng zawngah kal ula, thilsiam tinreng hnenah chanchin tha hi hril rawh u”. 


2. A pahnihna-ah chuan hmelma te hmangaih hi Krista rilru a ni. Bible lehlin tharah chuan “In hmelma te chu hmangaih zawk rawh u. An chungah thil tha ti ula, hmuh kir leh beisei kher lovin puk tir rawh u; tichuan lawmman tam tak in hmu ang a, chungnungbera fate in ni dawn nia. Ani zawngin lawmna chang hre lo te leh misual te pawh a khawngaih vek a ni” tiin kan hmu a, a fiah tha hle a ni.

 

        Kan Lal Isua hian hmelma te kan nih lai pawhin min hmangaih a, chutiang bawkin keini amah ringtute pawh kan chunga tha te chungah chauh ni lovin hmelma te chungah pawh that chhuah a, hmangaih zawk turin min duh a, chu tak chu Krista rilru chu a ni. Hmuh kir leh kan beisei te hnenah chuan puk tir kan hreh lem lova, kan beisei lem loh te hnenah chuan puk tir kan harsat si thin a nih hi.

 

3. A tawp berah chuan Chanchin tha Johana.17:11 ah chuan hetiang hian kan hmu a. “Ka pa thianghlim, nangin mi pekte hi i hmingin hum rawh, keimahni ang hian pumkhat an nih theih nan” tiin. Lal Isua’n amah ringtute hi pumkhata kan awm hi a rilru leh a duhthusam a nih avangin a pa hnenah pawh min dilsak a ni tih kan hria. Inpumkhat hi Krista rilru a nih avangin ringtute chu kan inpumkhat tur a ni a, lungrual tak leh inrem tlang takin khawngaih rawngbawl hna kan thawkho tur a ni.

        Kan Kohhran bik hi kan sawi fo thin angin kan inlungrual a, Pathian ram thilpekah te, Biak In sak kawngah te leh kawng hrang hrangah kan thawhhona a tha hle a, hei hi Pathian malsawmna kan dawn pawh a ni. Midangte aia kan that bik vang leh kan fel bik vang ni lovin Krista rilru kan pu a ni. Chutih ruala kan hriat reng tur erawh chu, Kohhran inenkawlna-ah te, rawngbawlna kawngah te Krista rilru hre rengin Fellowship Department hrang hrang KTP, KNP, KPP, KHP leh Kohhran hruaitute leh chhung tin te lungrual takin i thawkho zel ang u.

 

Tu in nge Lalpa rilru hre tawh a, Amah chu zirtir thei ang?

Keini erawh chuan Krista rilru kan pu a ni.

 

A thu Lalpa’n malsawm rawh se.