Kan rama ringtute tan hian kan Pathian hi a tha hlein ka hre thin a. Krismas leh Kumthar hunpui hlim leh lawm takin min hmantir thin a. Heng hunpui hi keini ringtute tan hian thlarau lama intuaitharna hun tha tak mai a ni a. Hlim leh lawm takin, thupui tha tak mai te neiin hun kan hmang a. Kan hlim leh lawmna pawhin a tawng sang hlawm hle a nih kha. Thupui tha tak mai, Pathianin min pek te hi Krismas leh kumthar chhung atan chauha kan hman tur a ni lova. Kum tluana kan hman tur a ni tih pawm tlang thei ila a tha hle dawn a ni.

        Hetianga thlarau lam ruai ropui tak kan kil hi helaiah hian a tawp mai tur a ni lova. Lal Isuan min beisei ang ngeiin rah kan chhuah tur a ni. Krismas leh Kumthar hunpui kan hman hi ral do tura thlarau lama kan inbuatsaihna hun a ni tih hre thar leh ang u.

        Lal Isua chuan rah chhuah turin min beisei a. Rah kan chhuahna tur chu Biak In pawnah a ni. Kan chhungkuaah te, kan hnathawhna hmunah te, kan khawtlangah te, Ramthim ramrovah te a ni a. A tawngkam dangah chuan Indona mualah a ni pawh kan ti thei ang. Lal Isua khan he khawvela rawng a bawl zawh hnuah khan a hnathawh chhunzawm turin amah zuitute hnenah mawhphurhna min hlan ta a. Keimahni chakna leh theihna chauh chuan heng a thupekte hi kan zawm thei dawn lo a ni tih a hre chiang hle a. Chuvangin a thuchah hnuhnungah pawh khan Grep hrui angin tehkhin thu a sawi ta reng a ni. Lal Isua chuan Grep hrui angin a intehkhin a. Pathian chu a huan enkawltu niin, keini ringtute chu a pengte kan ni a. Grep peng/zar chuan Grep hruipui a zawm loh chuan rah a chhuah thei dawn ngai lo a ni tih chu kan hrethiam vekin a rinawm. Chuvangin, Johana 15:4 ah khan Amah (Isua) hnenah awm reng turin min chah a. Amahah kan awm reng loh chuan kan rah thei ngai dawn lo a ni. Rah hi chhuah satliah ve mai turin min la beisei lo cheuva. Nasa tak leh hrisel taka rah chhuah tura beisei kan ni.

        Rah kan chhuah dan turah hian kawng hrang hrang leh hmun hrang hrang a awm ang a. Sawi zui tur tam tak a awm ang. A then chauh han tarlang ila:

 

1) Ramthim lama rawngbawlnaah:

        Kan kohhran hian Mission rawngbawlnaah hian theih ang tawkin hma a la ve zel a. Mission Golden Jubilee hial kan lo hmang tawh a. Mahse kan mission (ramthim) rawngbawlna hian hma a la sawn tam lovin, hmabak a la ko hle mai. Missionary kan tirh chhuahah hian duh tawk mai lo ila. An ni ho thilpek hmanga chhawmdawl leh an tana tawngtaina hi kum dang zawng aia nasa zawka kan thawh a hun ta. Keini a hmun thu ho leh a feh chhuak ho hi RINNA hmangin kan inzawm tlat a ngai a ni.

2) Kan khawtlang nun chhe mek siam thatnaah:

        Kan Kohhran Commitee chuan kan khawtlang nun lo chhe ta lutuk hi a vei hle mai a. Chuvangin Ruihhlovin a tihbuaite chhanchhuahna kawng pakhat atan kan kohhran chhungkaw zinga mi, Home lama awm duh Agape Home ah emaw, Kalvari Healing Home ah emaw dah ni se tiin a rel ta a. Hetianga Kohhran hmalakna a awm ta hi a lawmawm hlein ka hria a. Mahse hemi a hlawhtlinna tur chuan Kohhran hruaitute chauh hmalak theih a ni dawn lova, kan zavaia mawhphurhna a ni tel tho a ni tih kan hriat a tha hlein ka hria. Chuvangin hetiang mi, kan naute, kan thiante, kan chhhungte chu Home-a awm tura lo thlem a, lo sawm theuh turin kohhran mipuite kan inngen a. Hei hi kan khawtlang tana kan rahchhuahna tur kawng khat leh chu a ni.

3) Kohhran tana kan rawngbawlnaah:

        Krista Kohhran tana kan rahchhuahna tur kawng hi thui tak leh tam tak sawi tur a awm a. He khawvela kan la awm chhung hian Krista Kohhran tana theih tawp chhuah a, thawk tur kan ni. Kohhranah hian mi chi hrang hrang kan awm a. Kan vaia belhkhawm hian Kohhran kan lo ni chauh a. Chuvangin inhmangaih tawn a, thahnem ngai taka kan ral beih hi kan chhunzawm zel a ngai a ni.

        Kohhran tana kan thawhna hi a mal te te a beih chi a ni lova. Lungrual taka intanpui tawn chunga thawh ngai chi a ni a. Tu emaw chak fal deuh kuta dah mai chi a ni lova, a chak lo te tlansan mai chi lah a ni lo. Tu te pawh inthlauthla mai lovin, lungrual takin Krista leh a kohhran tan hian kan thawhho zel hi kan tih makmawh a ni. Kohhran hruaitu zingah te, KNP te, KTP te, KPP te, KHP zingah te pawh pawl hran leh inkawm hrang nalh bik awm lovin, kan za hian lungrual takin i thawk ho zel ang u. Chuti a nih loh chuan Krista min beisei angin rah kan chhuah thei ngai lovang.

        Heng kawng bakah hian, Kan chhungkaw nun chhe mek siam thatnaah te, Kan ram rorelna chhe mek siam thatna kawngah te, kan sumdawnna dik lo ta lutuk siam thatna kawngah te, Kan sawrkar hnathawhna kawnga kan ramin kawng dik lo a zawh nasat tawh siam thatna kawngah te keini ringtute hian siam that tur hmabak kan ngah hle a ni.

Lalpa’n a thu malsawm rawh se.