Luka 6:38- " Pe rawh u; chutichuan pekin in awm ang; thahnemngai taka teha, beng muka, sawi muka, liam zawih zawihin in malchungah an pe ang che u. In tehna ngai bawkin an tehsak dawn si che u a"

Kan thupui hi thupui lar tak leh Pathianin min fiah rawh u, a tih awm chhun Thilpek chungchang a ni. Mihringte hi kan mak khawp mai. Petu nih hi hlawkna leh malsawm dawnna a ni tih  hre reng chuang hian Pek aiin dawn hi nuam kan ti zawk fo thin. Chumi awmzia chuan mihring hi duhamna a khat midangin an neih ai chuan keiin ka neih chuan a tawk, tihna rilru he thinglungah hian a lo pian thin vang a ni.

Lal Isua kha khawvela a lo kal lai khan thupek min pe nasain kan tihtur tam tak min tuk a. Chung zingah chuan Chanchin Tha hril leh Thilpek hi a pawimawh zual leh langsar pawl a ni ngei ang. Vanrama a chhoh dawnah khan a zirtirte hnenah chuan Ram zawng zawnga kal a, Chanchin Tha hi hril turin thu a pe a, chu chu Lal Isua ringtu keini Kristiante hna pui ber a ni ti ila kan tisual awm lo e.

Chanchin Tha hriltu mi tam tak an awm a; an hril dan erawh a in ang lo a. A then chu TV leh Internet kal tlangin Chanchin Tha an puang darh a.  A then chuan lehkhabuah ziakin an puang chhuak a. Tin, a then chuan anmahni ngei kal chhuakin an puang darh bawk a. Heng kan sawi tak zawng zawngte hian an nun leh an hun pumpui chu Lal Isua thupek zawmin Chanchin Tha an hril a, an nunna leh an neih zawng zawng pawh an hlan ral thin a ni. Heng ho hi Evangelist, Pastor, Speaker, Missionary etc tiin kan sawi thin a, an hluin an pawimawh em em a ni.

Chutih rual chiah chuan keini kal chhuaka Chanchin Tha va hril ve thei lo, hun puma va thawk thei lo leh lehkha ziak thiam lo, thusawi thiam lo te hi kan pawimawh lo bik em? Lal Isua thupek hi kan zawm thei loin Chanchin Tha hi kan hril ve lo em? Hnai love, keini pawh hi Chanchin Tha hriltu ropui tak kan ni a, kan ni mek bawk a, kan la ni lo a nih pawhin tunah kan ni nghal thei. Engtin maw? E le, kan Thilpek hmangin maw le!

Kan thilpek tlem te tlingkhawm hmangin miin Pathian Lehkhabu Thianghlim-Holy Bible an lei in an chhiar phah a, chu tluka Chanchin Tha hril a awm chuang em ni? Chanchin Tha hrila an hun pum hlantu Pastor te tan an ni tin ei leh bar tur chu kan thilpek tlingkhawm hi a ni asin! I thilpek kha a va hlu em! Missioanary zawng zawngte ei leh in kha i sum pek atangin a ni a sin. Tin, i thilpek tlem te avang khan miin i nunah Lal Isua an hmu a, Lal Isua chu neih ve an chak asin. Lal Isua thupek awiha mi chanhaite thil i pek khan Lal Isua kha i pe tel zel a, chu tluka Missionary ropui tu nge awm chuang?

I thilpek avang hian i harsat phahin i retheih phah em? Hnai love, Pathian chuan " Ka inah eitur a awm theih nan, sawma pakhat zawng zawng chu Thawhlawm inah rawn la khawm rawh u; Van tukverhte chu hawnsak che uin, malsawmna dawn sen loh khawp hial ka vur dawn che u nge dawn lo che u, mi han fiah teh reng u" a ti sin, a va ropui em!! Pathian ram zau nana thil kan pek hian Lal Isua thu kan awih a ni mai lo a, malsawmna kan la dawng dawn zui a, thahnemngai taka teha, beng muka, sawi muka, liam zawih zawihin in malchungah an pe ang che u tih kan la ni zui-kan va vannei thuah hnih em!

A chang hi chuan kan pe hreh a, kan pe ui a, kan pe phal lo a, kan ring zo lo thin. Mahse Pathian thutiam hi a daw ve ngai lo a, a fiah ngam apiangte chu an hausak belh thur thur a, nun tam an neih belh chhah sauh sauh zawk thin. 'Eng lo lak aiin pekin lukhawng a nei zawk' tiin Lal Isua ngeiin a sawi kha.  Neih ui puia sem chhuak tlem apiangte hi mi rethei, nei teuh si a nei lo nia inhre tlat, rilru hah  reng renga khawvel chhuahsan thinte an ni zawk a. Malsawmna pawh hi an dawng ngai lo a, thil ngah-rilru rethei siin an awm zawk thin. Chuti ang mite chu mi awhawm leh mi hlim an ni ngai lo a. Neih ang chhun chun pawh mite tana hlim taka pe chhuaka sem chhuak tam apiangte hi mi awhawm, mi hlim thei leh chatuan nun kawltute an ni. Pathian pawhin hlim taka petu te hi a ni a hmangaih ni.

Pek tur kan neih tam leh tam loh hi Lal Isua'n a en lo a, kan pekna rilru zawk kha a en thin. Chanchin Tha Luka ziak bung 21 -na kan chhiar chuan Hmeithai thawhlawm Dere  pahnih kha Lal Isua chuan a tam ber tiin a zirtirte a hrilh a nih kha. Hemi awmzia ber chu pek tur kan neih tam leh tam loh lam a ni lo-kan pek duhna rilru zawk kha Lal Isua hian a en a ni. Chuvangin tam lua leh tlem lua a awm lo-thilpek ah hian. Thilthlawn pek dawngtute hlimna leh lawmna hi khawvel pawisa-a lei tur a awm lo a, a petu keini lawmna leh hlimna pawh hi khawvela Billionaire zawng zawngte hian an lei zo chuang lo.

Sum te chu Pawisa mai mai a ni a, i thilpek erawh chu i thinlung a ni.

Tuiah leh thlarauvah piangthar inti hle mah ila thilpek lama kan pianthar tel si loh chuan a pawi thei. Pathian hnen atang lo chuan malsawmna leh vanneihna hi a dawn theih ngawt loh. Hetiang malsawmna hi chan kan duh chuan, kan thilphal hmasak a, a chanpual tur te, kohhran a taksa siam puitlinna turte ui lo leh hlim taka kan pek fo thin a ngai hmasa, chuti lova Lalpa malsawmna dil fo hi a dik ber lo. Harsatna- chhungkuaah, kan fateah, kan pasalahte a lo awm hian a tihdamna dil fo mi kan nih chuan a tha ber lo, a duhzawng kan tih a, kan awm a ngai ve thin a ni. Kohhranah Department hrang hrangte kan awm a, chungte chuan Target te neiin kan pawisa thawh ve theih zat turte min tuk ve thin. A khawntuten a hun taka an lo khawna lo pek thinte hi Lalpa hnena pe thin kan ni. Kan pek tam leh tlemah kan Pathian hi a lawm ber lova, kan neih ang angte lawm tak leh hlim taka kan pekah a lawm mai zawk a ni. Hmeithai thawhlawm pekah Lal Isua a lawm hle ang khan thinlung taka lawm taka kan pekah Lalpa a lawm mai thin.

             Piangthar tih chu mi an awm dan tha lo leh mawi lo thin kha an duh lova an tlansan thin hi a ni. Dawt sawi hrat tak thin khan thudik tak a sawi tawh thin, mi uikawm tak thin kha a thilphal tawh thin. Lalpaah kan pianthar tawh tak tak chuan kan awmdan tha lo zawng zawng kan kalsan thin a ni. Thilpekah i piangthar tel zel ang aw, “ Pe rawh u tichuan pekin in awm ang ”. A chunga kan sawi angin Pathian hmangaihna leh piantharna tak tak atang lo chuan a harsa hle thin. Mahse Amah avanga nunga hnathawk thei chauh kan nih avangin min petu tan ni se. Pe tam chuan a dawng tam ang a, pe tlem chuan a dawng tlem mai dawn a ni. Kan pek ang ang hi keima tan, chhungkaw tan, nangma tan a ni zel. Ni in i hria em? Thilpek lama mi uikawm, nei ngai lo, harsa inti reng mite hi an hrisel thei ngai reng reng lo e, an tih chu. Aw le, Pathian tana thilpek chi hrang hrangah hian chhungkhata Nu L.A.D te kan pawimawh hle mai. Mawhphurhna sang tak, Pathian malsawm dawnna leh dam lohna kan kutah hian a awm. Kan pawimawh hle mai, kan pasal ten an hlawh an rawn hawn a, kan faten an hawn bawk a, inchhung an rawn thlena a kalna tura thawh tur peng hrang hranga a tlem emaw, atam emaw; kan lo dah (thun) zel hi kan mawh a ni.

I pek tam leh tam loah kan Pathian hi a innghat ve lo

Pek tur kan neih tam leh tam loh hi Lal Isua’n a en lo a, kan pekna rilru zawk kha a en thin. Chanchin Tha Luka ziak bung 21 -na kan chhiar chuan Hmeithai thawhlawm Dere  pahnih kha Lal Isua chuan a tam ber tiin a zirtirte a hrilh a nih kha. Hemi awmzia ber chu pek tur kan neih tam leh tam loh lam a ni lo-kan pek duhna rilru zawk kha Lal Isua hian a en a ni. Chuvangin tam lua leh tlem lua a awm lo-thilpek ah hian. Thilthlawn pek dawngtute hlimna leh lawmna hi khawvel pawisa a lei tur awm lo a, a petu keini lawmna leh hlimna pawh hi khawvela Billionaire zawng zawng te hian an lei zo chuang lo. Chuvangin, hlim takin i pe ang u. Kan Pathian hi thilpeka hneh ban theih loh Pathian a ni tlat. Kan pe a, a aia tam min pe a, kan pek tam pauh leh a ni chuan min pek let hi a tam a ni mai. Amah chu malsawmna hnar  a nih tlat avangin, thilpekah hi chuan kan hneh thei tak tak dawn lo. Chuvangin, pek tur i neih tam avanga pek ai chuan chan ngam khawpa i peknaah khan Pathian ropuina chu a lo lang mai chauh dawn a ni. Tam tak nei si, ui tak chunga pek ai chuan kan neih chhun thinlung hlim taka kan pek hi kan Pathian hian a duh ber, chuvangin, ani chuan i neih tam leh tlemah a en ve lo che a ni

Luang chhuak lo tuikhur chu a thianghlim thei lova, a in tlak hek lo. A luan chhuah tam pauh leh a tui a thianghlim thin. Chutiang bawk chuan, Pindan chhung boruak  pawh a chhuahna a awm loh chuan, room nuam tak a ni lova. Boruak chhuahna a awm tam pauh leh boruak thianghlim a lo lut a, nuam kan tih thin ang hian, kan rilrua Pathian thu a luh a, kan pek chhuah tam chuan a lut leh mai thin. A ni, thilpek Pathian hnena kan dawn pawh hi kan pek chhuah tam pauh leh malsawmna tam tak kan dawng a. Kan hriat loh lam atang te pawhin Pathian malsawmna hi kan lo dawng thin hi a lo ni. Pe rawh u, tichuan pekin in awm ang, ti a min hrilhtu hian a thutiam hi a hlen tih hi kan hriat nawn fo a ngai a ni.

A tawp ber ah chuan, KHB 590 chang tawp berah chuan heti hian a ti a. 

Ringtute u, khaw nge ro in khawl khawm dawn? 

Thlarau bova i khawl khawm chu i hum ang; 

Rinnaa i pek tur chu Lalpan a nghak reng a ni,’

Eng zatah nge min rin ngam dawn le?’ a ti. 

Chuvangin, nang leh kei hi kal chhuakin rawng kan bawl thei si lova, thilpekah tal hian tan kan la dawn lawm ni. Kohhranin Envelope kan sem a, colom pakhatah Relief tih a awm a. Chu relief chu kan sem chhuah tam pauh leh a lut hi a tam mai niin ka hre thin. Chuvangin, relief a sum i dah tam pauh leh midangte malsawmna an lo dawng thin a. Mission lama i dah tam pauh leh thlarau bo ten Lal Isua an lo hmuh theihna turin kan Mission rawngbawlna kawngah nasa takin hman kan sawn mek zel bawk a ni. Chutiang bawkin, Kohhran thenkhat ten sawma pakhat chu Headquarter-ah kan chhung lut mai mai a lawm, an ti thin. Hei erawh hi Sawma pakhat kan pekna hi an hriat chian loh vang zawk a ni. Sawma pakhat kan pek hi ECM Headquarter-ah ni lovin Pathian tan, Pathian in ka ta, a ti a. A neitu hnenah Kohhran kaltlangin kan pe mai chauh zawk hi a lo a ni. Chuvangin, Kohhranho te u, Pe rawh u, ti chuan pekin in awm ang, titu kan Pathian hian thilpeka fiah a ngam ang hian, kei ni pawh hian i fiah ve teh ang u....