“Hawh u, Lalpa hnênah i kîr ang u: Min lo pawtsawm tawh na a, min tidam leh dâwn si a, Min lo vaw tawh na a min tuam leh dâwn si a”. (Hosea 6:1)

“Thinura ram chu ka tihchhiat vek loh nan a bang chim rem tha tur, a chhe laia lo tang tur mi, an zingah ka zawng, ka hmu zo hauh lo. Chuvangin ka thinurna chu an chungah ka leih ang a, ka thinrimna mei chuan a tihlum ang; an thiltih mawh chu an chungah ka nghat dawn a ni”. (Ezekiela 22 : 30 – 31)

Ezekiela hi Buzia fapa, zawlnei leh puithiam ni kawp a ni a, Babulon saltang zinga tel ve a ni. A hming awmzia hi ‘Pathianin a tichak’ tihna a ni. Zawlnei ni tura koh a nih lai hian kum 30-a upa a ni a, kum 593 BC vel niin an sawi. A rawngbawl hun hmasa lam Ezekiela bung 1- 24 hian Pathianin Juda te chunga a rorelna a sawi ber a. Sual demna, vaukhanna leh tha taka awm tura ngenna lam a sawi bawk. 

            Israel fate Babulon awpna hnuaia an awm lai hian an nun kawng a chhuk chho ve hle tih a hriat a. An nun dan leh khawsak danin Pathian an tilawm tawk lo va. Mahse, Pathian hmangaihna chuan nasa takin a umzui renga an insiamthat theihna tur leh A thu an zawm theih nan zawlneite hmangin Pathianin an hnenah thusawiin a vaukhan reng bawk a ni. Zawlnei Ezekiela hnena a sawi hi kum sang tam liam tawh mahse vawiina Mizo Kristiante tan a pawimawh dan leh a hlutna a nep chuang lo. Kan tan pawh harhchhuahna tur leh inenlet vawng vawngna tura thu pawimawh a ni a. Tuna kan ram dinhmun leh tawn mek nen pawh a inmil hle.

Tunlai khawvela kan buaipui ber chu hmasawnna a ni. Hmasawn loh hlau hian ram, khawtlang, chhungkua leh mimal kan intlansiak nasa a. Kan thlenna tura kan beisei erawh kan dinhmun azirin a danglam vek. Chu hmasawn duhna leh duh tawk reng nei lova kan khawsakna chuan kan nun a tichhe nasa hle a. Hawina lam apiangah thawm tha lovin min chim buai mup mup reng a nih hi. Hmasawn kan duhna chiah hi min siamtu lama tang lova kan hlat phahna a ni a. Sengkhawm lova tidarhtu kan nihna pawh a ni ta a ni.

Mihringte hi Pathian vahbosan reng mai thîn kan ni a, kan duhzâwng te kan châk zâwng te hi Pathian duhloh zâwng hlir mai a ni hîn a. Khawvêla kan lo pianchhuah phat aang hian sual lam âwn nghâl mihring kan ni a, sual kawng zawh tûrin kan rilrû a hmanhlel hîn. Chutiangin, mi tam tak chuan nîtin nuna an buai êm avângin an nunin a pan lam pawh an ngaihtuah hman lova, sual kawng thui tak zawhin, kîr leh an harsat fo hîn. Bible thusawite hria a, nunpui tum zet si a, dam chhûng lungkhamnate avânga tawlh bo leh ta mi mhenkhat an awm bawk a. Pathiana nun nei tawhte ngei pawh Amaha kan awm reng loh chuan sual tân kan lo nung reng tawh hîn a lo ni.

Sual tâna nung thînin mahni duhna lam lam kawngah leh mahni duhdân ang angin kal thîn mah ila, Pathian hmangaihna chuan min lo ûmzui zêl a. Kan sualte sima Ama hnên lama kan kîr leh theih nân kan nunnate min la zuah sak a, sual hle mah ila, damna leh hrisêlna tha tak kan neihte hi Pathian hmangaihnain Ama hnêna kan kîr leh theihna kawng min hawnsakna a ni tih kan hriat a pawimawh hle mai.

            “Mi suaksual chuan a awm dân chu bânsan sela, mi fel lo chuan a ngaihtuahnate chu bânsan bawk rawh se: LALPA hnênah kîr leh rawh se, tichuan Anin a lo khawngaih ang; kan Pathian hnênah kîr leh rawh se, Anin a ngaidam nasa khawp dâwn si a” (Isaia 55:7). Pathian duh loh zâwngin lo kal tawh thîn in, Pathian hmangaihna lo vah bo san tawh mah ila, inchhîra a hnên kan pan phawt chuan min lo ngaidamin a fa nihna hlu tak chu kan tân a la dah reng a ni.

“Pain mi pêk zawng zawng ka hnênah an lo kal vek ang; tupawh ka hnêna lo kal chu ka hnawtchhuak tawp lovang” (Johana 6:37)


Fapa tlânbo khân a inhriat chhuah khân neih a nei tawh lova, ka thil lo tihsual tâk zawng zawng te hi ka’n siam tha leh phawt teh ang tiin a pa ro a deh ral tâk zawng zawng te kha rulh tum phawt se chuan a tân tihngaihna a awm lovang. Thil tam tak a lo tisual a ni tih a inhriat vêleh a nihna ang anga a pa hnêna a inlamlêt mai khân a pa’n a lo ngaidam a, a sum deh ral tâk leh a hloh tawh zawng zawng te kha a pa zâwk chuan a rûl leh ta a nih kha.

 

Mi tam tak chuan thil ka lo tisual a ni tih kan in hre chhuak a, amaherawhchu, Pathian hnêna lêt nghâl mai lova, keimahniin kan tihsual tawh te lo siam hat hmasak ve phawt kan tum hinna hian min ti tangkhang ta hîn a. Kan thei leh tak tak chuang si lova, ûl lovah hun kan khawhral a kan buai telh telh thîn.

 

            Chuvang chuan, hei hi ka’n siamtha phawt ang e, kan chhûngkaw buaina ka’n chingfel hmasa phawt ang e, midang nêna kan inkâr buaina hi ka’n chingfel hmasa phawt ang e, kan tihhmasak hian eng buaina mah kan chingfel tak tak ngai lova, a buai telh telh zâwk thîn. Chutiang tûr chu a ni lova, kan inhriatchhuah vêleh kan nihna ang anga Pathian hnêna kan lêt nghâl mai hian thil tam tak a lo fel hma zâwk hîn a ni. Eng dinhmunah pawh ding ila, eng ang pawhin sual mah ila, “Lalpa ka nihna ang angin ka rawn pan che” kan tih mai hian Aman a bâk chu a lo chingfel mai thîn a ni.

“Mi fel takte lam tûra lo kal ka ni lova, mi sualte lama simtir tûra lo kal ka ni zâwk” (Luka 5:32)

Keini pawh hian thil kan tisual vek tawh ang, tunah pawh kan tisual mêk pawh a ni thei e. Kan tisual a nih chuan, Lalpa hnenah i kir ang u, Kraws-a min tlanna thisen chhuak kha engmahin a pawlh dal theilo. Sual nasa ber pawhin Isua Krista min tlanna thisen kha thiltithei lovin a siam thei lo a ni. Sual ngaihdamna beiseia Isua pantu te chuan, Isua an pan thlawn ngai lo va. Fel phawt lam a ni lova, pan phawt lam a ni zâwk. Tisual tawh leh tisual chungin Isua hi pan ila, anin kan sim theihna tûrin min lo pui zâwk dâwn a ni.

Pathian hmangaihna tâwp khâwk chuan Vân hmun ropui chu Kalsanin he lei ânchhedawngah hian min rawn zawng chhuak a, min rawn pan a, a hnên kan thlen theih nâna kan mamawh engkim chhandamna hna min thawh zawh sak tawh a ni. Pathian hmangaihna tâwp khâwk chuan a vawikhatna atân a rawn zawng chhuak tawh che a, a rawn pan tawh che a, i mamawh engkim a ti zo tawh a. A vawihnihna atân a rawn pan tawh dawn lo che a, a vawihnihnaah chuan nangmah ngeiin i pan ve a ngai tawh a ni. A rawn kal leh hun chuan engmah min tihsak tawh dawn lova, Amah ringtute a rawn lam ringawt tawh dâwn a ni. Chuvâng chuan, hun tha kan neih lai hian Pathian hnên i pan ang u.

Lalpan a thu malsawm rawh se.