Vawiina kan ngaihtuah ho tur leh kan zir ho tur atana ka thupui rawn thlan chu DUHTHLANNA tih hi a ni dawn a ni.

Duhthlanna awmzia:

Pathian thil min pek hlu ber chu ‘nunna’ a ni a, a dawtah chuan ‘duhthlanna’ hi a ni. Duhthlanna kan tih chu, rilru leh ngaihtuahna uluk taka kan hman hnua thuthlukna kan siam hi a ni kan ti thei awm e. Kan thiltih leh kan awmdan tam tak hi duhthlanna kan siam dan azira lo awm a ni bawk a ni. 

(1)       Duh thlang theia siam kan ni hi mihringte kan ropuina leh kan danglam bikna a ni. Mihring suala a tluk hma leh a tluk hnuah pawh duhthlan theihna pek a la ni reng a, hei tak hi Pathianin mihring a dah ropui bik zia tilang tu a ni.

Duh thlan theihna kan neih hi kawng dik leh diklo min zawhtir theitu a ni a. Duhthlannaah kan fimkhur a ngai hle tih kan hre thei awm e. Ringtute tan chuan Bible hi kawngdik min kawhhmuhtu leh chhandamna kawng min hrilhtu a ni a. Pathian hmangaih a, a thupekte zawm a, thihna aia nunna leh anchhia aia malsawmna thlang thei tura min zirtirtu a ni.

Duhthlan theihna kan nei kan tih avang hian kan duh duh kan tithei tihna erawh a ni lo. Midang tana harsatna thlen tur zawnga duhthlanna kan siam thin chuan khawvel danah pawh thiamloh chang kan ni thei a, Bible min zirtir dan pawh a ni lo. Midangte tana malsawmna thlentu ni zawk tura zirtir kan ni. 

(2)       Duh thlan tur chu kawng hnih chauh a awm (Deut.11: 26-28):

Nunna leh thihna, malsawmna leh anchhia, Pathian duh zawng leh sual Setana duh zawng. Khawvela kan dam chhung hian duhthlan theihna hun kan nei a, thih hnuah chuan tuman duh an thlang thei tawh lo. Kan dam chhung hian rilru ngaihtuahna fim tak hmangin duhthlanna/thuthlukna kan siam tur a ni. A chhan chu duh thlang thei tura mawhphurhna pek kan ni si a. 

Kan Bible-ah hian duhthlanna hmang dik lo, duh thlang sual sawi tur tam tak an awm. A hmasa berah chuan thlahtu bul Evi leh Adama te hi an ni. Theirah ‘ei loh tur’ tia Pathianin a hrilh chu an duhthlanna hmanga an ei avangin khawvel hi anchhedawng a lo nih phah a, chatuana boral tur, chhandam ngai kan lo nih tak nachhan hi a ni. A dawtah chuan Lal Davida kha a ni thei ang. Mahni nupui duhtawk mai lova Uria nupui chu neih belh a duhna chuan duhthlanna sualah a tluk tir a, chumi avang chuan a lalram a chhiat phah a, a chhungkuaah buaina namenlo a chhuak bawk a ni. 

Hei lo pawh hi sawi tur tam tak an la awm ang. A hunlaia Lal ropui leh thil tithei Solomona pawh kha a ni. Amah avangin Israel ram a tluchhia a, Israel leh Juda hnama thenin an awm ta a ni. Heng zawng zawng hi duhthlanna hman dik loh vanga lo awm a ni. Pathianin duhthlan theihna zalenna min pek hi kan hman sual chuan a tuartu tur chu keimahni kan ni.

3)         Duhthlanna dik thlangtu te pawh kan Bible-ah hian mi tam tak an awm. Chung ho zinga a langsar zualte chu Abrahama te, Josefate, Daniel-a te, Mosia te, Paula te leh midangte pawh an awm teuh ang. Heng mite hi kan entawn atan an tha hle a, rinna kawngah leh rawngbawlna kawngah kan entawn a pawimawh hle a ni.

A tawp ber atan chuan Mathaia. 12:37-ah Lal Isua ngeiin, ‘I thuin thiamin i awm ang a, i thu vekin thiamlohin i awm ang’ a ti a ni. Kan duhthlanna min dah pawimawh sak hle a, chuvangin hei hi hre reng ila; englai pawhin kan hmaah duhthlan tur kawng hnih, inpersan tak a awm reng a, a eng zawk nge kan thlan dawn? Nunna chu thlang rawh u, in nun theih nan, nangni leh in thlahte nen.

Lalpan malsawm rawh se. Amen.