Bible ref:- Eze 3:18-19:- Misual hnena ka thu, 'I thi ngei tur a ni,' ka tiha, chu mi suaksual chu a nunna hum tura a sualna kawng kalsan turin vauna i neih lohva,  vaukhanna thu i hrilh bawk si lohva, chu mi suaksual chu a khawlohnaah a thih chuan, a thisen mawh chu i lakah ka phut ngei ang. Amaherawh chu, chu mi suaksual chu i vauva, a suahsualna a kalsan lohva, a sualna kawng a hawisan bawk loh chuan a khawlohnaah a thi ang a, nang erawh chuan i nun i chhanhim a ni zawk ang.


Joh 4:34-35:- Tin, Isuan an hnenah a sawi a, "Mi tirtu duhzawng tih leh, a hnathawh zawh tur hi ka chaw a ni. Nangnin, 'Buh sengna tur thla li a la awm' in ti lawm ni? Ngai rawh u, ka hrilh a che u, dak ulang lote en rawh u, tun apangin seng turin a eng a ni.


Aw le, kumin 2023 KNP Day-17th May 2023 thupui chu:- "Um la, chhan chhuak thuai rawh," 1Sam 30:8 a ni a. Kumin, ECM KTP kumpuan chu, "Thlarau bo man kum," tih a ni a. KTP Day 10th June 2023 thupui chu, "Thi tura hruaite chu chhan chhuak rawh," Thf 24:11 tih a ni a.


Ramthim ni 1st Aug 2023, thupui chu, "Buh seng tur a tam si a, nimahse la, thawktute an tlem," Mt 9:37 a ni leh a.


Kan kohhranin kumin hun pawimawh vawi-3 kan hman tawhna thupuite ngaihtuah hian, Thupuiina a tum ber chu *"Thlarau bo chhandam,"* tih hi a ni. Hei hi kohhrante mawhphurhna a ni ang ngeiin, Lal Isua Krista khawvela a lo kal chhan pawh kha a ni. 


Chuvangin, a khaikhawm nan, *"ECM kohhran hi Apostolte din Missionary kohhran a ni,"* tih thupui hmangin kan ngaihtuahho dawn a ni.


Kan ECM kohhran Thurin buah chuan, *"ECM Kohhran hi Missionary kohhran a ni,'* tih kan hmu a. *"Missionary kohhran a nihna chhan chu,  kohhranten, Thuhriltu tirhchhuah na chang kan hriat hi a ni. Hei hi Apostolte din Missionary kohhran a nihna chu a ni,"* tih kan hmu a.


Pathianin a fapa khawvelah a tir a, fapain Tirhkohte a tirchhuak leh a, Tirhkohten Thuhriltu dangte an tirchhuak leh a, Thuhriltuten kohhran an din zel a, chuvangin Kohhran chu, 'Apostolte din, Missionary kohhran,' tih  a lo ni ta a ni.


Chuvangin, ECM Kohhran pawh hi, Apostolte din, Missionary kohhran dik tak chu kan ni.


Kum zabi-1naah khan Rom sawrkarin Kristiante kha an tihduhdah nasa em em mai a. Khata tang khan, khawvelin Chanchin tha kan lo hriatphah ta a ni.


England ram pumpui harhna thlenna chhan kha, tlangval lungmawl ve tak mai leirawhchan khura thawk pakhat chu Pathianin nasa takin a hmang a, England ram pumpui chu Thlarau thianghlim harhnain nasa takin a nuai a. A bik takin chanchin tha hrilhna lamah nasa takin harhna a thleng a ni.


Chumi zarah chuan keini Mara ram pawhin kum 1907 ah Pathianin Rev RA Lorain te nupa min rawn tirhsak ta a ni.


ECM kohhran chuan Chanchin tha kan dawn  atanga kum 59naah chiah, kum 1966 khan Missionary hmasa ber Evan A.Khòsa chu Khumi field-ah kan lo tirchhuak ve thei ta a ni. Lalpa chu ropui ber rawh se!


Missionary kan tirhchhuah atangin kumin hi kum-57na a lo ni ve ta. Lalpa chu fakin awm rawh se!


Tunah chuan ECM kohhran hian Mission field 5 leh partnership a kan thawhna 6 nen chuan Mission field=11 laiah Missionary 160 leh Teachers 26 te nen chuan=186 lai mai tirchhuak vein, kohhran 73 lai kan nei a, kohhran member=3067 lai kan lo nei ve ta. Lalpa chu ropui ber rawh se!.


Eze 3:18-19 ah chuan, Misual hnenah ka thu, 'I thi ngei tur a ni,'  ka tiha, chu mi suaksual chu a nunna hum tura a sualna kawng kalsan turin vauna i neih lohva, vaukhanna thu i hrilh bawk si lohva, chu mi suaksual chu a khawlohnaah a thih chuan, a thisen mawh chu i lakah ka phut ngei ang.


Chu, Lal Isua Krista chanchin tha, a thihna leh thawhlehna thu hi keini ringtute hian kan hrilh lo a nih chuan, an thisen mawh chu Lalpan kan lakah a phut ngei dawn a ni tih a chiang a ni.


Hei vang hian a ni, Tirhkoh Pawla pawhin, Chanchin tha hi hril suh ila, ka chung a pik dawn si a," a lo tih ni.


Chang-19na kan chhiar thlak chuan, 'Amaherawh chu, chu mi suaksual chu i vauva, a suahsualna a kalsan lohva, a sualna kawng a hawisan bawk loh chuan a khawlohnaah a thi ang a, nang erawh chuan i nun i chhanhim a ni ang,' tiin min hrilh leh a.  Kan thiamchhanna awmchhun chu an hnena chanchin tha hrilh a ni tih a chiang.


 Chuvangin keini ringtute hian thlarau bo chhandam hi kan hnapui ber a ni tih hi i hre thar leh ang u. 


Kohhran puipa Tertuliana chuan, "Kohhran hian, chanchin tha hril loh hi chu dinchhan a nei lo," a lo ti a. Hei hi a dik hle a ni. Lal Isua khawvela a lo kal chhan chu a mission hna thawk turin a ni. Ama zuitu, a thisena a lei kohhrante pawh hian kan din chhan ber chu, Chanchin tha hrilh hi a ni tih i hre reng fo ang u.


Switzerland mi Emerson Brunner chuan, "Mei chu a alh a a nung reng angin, kohhran chu Mission vangin a nung a ni," a lo ti a. ECM kohhran pawh hian, 'Kum 1966 a Missionary kan tirh atang khan kan ram pumpuiah Kohhran harhna hi a khat tawk hian a thleng reng a ni,' an ti thin. Hei vang hian kohhran pawh hi, mei chu a alha a nun reng angin kohhran pawh hi mission rawnbawlna vangin a nung reng a ni. Chuvangin, kohhrante hi harh kan duh chuan Mission rawngbawlna hi ngaihthah lova tan kan lak thar reng a ngai a ni.


Joh 4:34-35ah chuan, Lal Isuan, 'Buh sengna tur thla li a la awm,' in ti lawm ni? Ngai rawh u, ka hrilh a che u, dak ulang lote en rawh u, tun apangin seng turin a eng a ni,' a ti a. Mt 9:37ah chuan, "Buh seng tur a tam si a, nimahse la, thawktute an tlem," a ti a. Khawvelah hian chanchin tha hre lovin ni tin leh darkar tin hian mual min liamsan zel si a. Kan kohhran chhungkuaah pawh, he Lal Isua Krista kan tana a thiha a thawhlehna chanchin tha, Joh 3:16:- 'Pathianin khawvel a hmangaih em em a, chutichuan a fapa mal neih chhun a pe a, Amah chu tupawh a ring apiang an boral lova chatuana nunna an nei zawk nan," tih la hre lote hnena chanchin tha  hrilhhriat hi kan bat a ni. Chhandamna thu hre si a, nunpui thei lo, zawm thei lote hnenah pawh beidawng lovin kan hrilh zel tur a ni. Kan Pathian thuin, Um rawh, i umpha ngei ngei ang a, i chhanchhuak vek ngei ngei ang," 1-Sam:30:8ah kan hmuh kha, kan umphak hma chu kan beidawng tur a ni lo. 11-Lalte 7:9:-  Vawiin hi chanchin lawmawm thlenna ni a ni a, keini hi kan ngawi reng mai a, khawvàr kan nghah chuan hrem kan tawk mai ang, chutichuan hawh u, lal chhungte i va hrilh ang u," tiin an inbia a, tih kan hmuh ang khan.


Hman kum khan kan kohhran KHP ho khan hla zir tur an nei mumal loh avangin ka siamsak hlawm a.


1.Lal Isuan, nang leh kei tan,

Kan sual tlanin a thi;

A tlanna hlu tak chuan,

Nang leh kei min chhandam ta.


*Vawiin hian Pathian hna thawk turin,*

*I kut lo chu, kut a nei lo;*

*Midangte kawnga hruai turin,*

*I ke lo chu, ke a nei lo.*


Tunah hian kan aiawhin Rangkachak khura thawk turin missionary 186 kan tir mek a. Keiniho hi a hrui vuantute kan ni. Chuvangin, inthlahdah thei kan ni lo a ni tih i hre thar leh ang u.


Lal Isua khawvela a lo kal chhan chu, 'A mission hna thawk turin a ni,' kan tih tawh kha. He rawngbawlna hna ropui tak thawk tur hian, keini, a thisena a lei, ama ringtute kohvah hian a nghat a ni. Lawm chungin he rawngbawl hna hi i thawk zel ang u. ECM kohhran hi Apostolte din Missionay kohhran kan ni si a.


Lalpan malsawm rawh se. Amen