‘Tin, Lalpa Vantirhkoh chu a hnenah a rawn inlar a, a hnenah, “Nang mi chak huaisen, Lalpa chu i hnenah a awm e,” a ti a.

Roreltute 6:12. 

Thi tura hruaite chu chhanchhuak thuai la, thah mai turte chu chhanchhuak thuai rawh. 

Thufingte 24:11.


        Kan Bible chang chhiar tak, Thufingte 24:11 thu hian midangte chunga kan mawhphurhna leh mite tanpui tur kan nihzia tarlan a tumna ber a ni.

1.      A hmasain ‘Tute nge thi turte chu? Tute nge thah mai turte chu? tih hi han ngaihtuah hmasa ta ila:

He lai Bible thuin sawi a tum hi thlarau lam thihna ni lovin tisa thihna a ni a, chutiang a nih si chuan mi zawng zawng, lo piang chhuak tawh zawng zawng hi thi vek tur kan ni a, chhanchhuah ngai vek kan ni tihna em ni ang?

            Bible-a kan hmuh ‘thi tura hruai’ leh ‘thah mai turte’ a tih hi kawng hnihin a ngaihtuah theih awm e;

a) Kawng khatnaah chuan, heng hunlai hian rorelnain thiam loh a chantir mi tam tak an awm a, chungho a sawina chu a ni a,

b) Kawng hnihnaah chuan, mi hausa zawk ten an rahbeh leh hnuaichhiah em em mi rethei zawkte, mahni nunna hial chan ta te sawi a tumna a ni bawk. 

Heng hunlai hian chhantu an neih loh avangin thiam chang thei reng pawh kha thiam loh chantir an ni fo thin a, an nunna hialte an chan phah thin. Rorelna fel lo, rorelna dik lo kha a hluar em em a ni. Chung chanchhia changtute chhanchhuah chu lal Solomona khan a duh em avangin a fapa lal lo ni mai tur tana a fuihna thu a ni.

 

2. Eng vangin nge ECM KTP Hqrs. hian he thu kher hi kumin 2023 thupui atan a thlan ni ang le?

Ngun taka kan ngaihtuah chuan, kan bible thu atanga kan hmuh chu tihduhdah tuarte leh  hremna tuarte chhanchhuahna hna a ni ber a; amaherawhchu, keini chuan tihduhdah tuarte leh hremna tuarte chhanchhuak turin theihna leh finna pawh kan nei der si lova, eng vang chiahin nge he thupui hi kan hman ni ang le!

Heti zawng hian han ngaihtuah ta ila, kan chhehvelah sualna avanga Pathian hnaih thei tawh lo, ruihhloin a tihbuai, retheihna leh harsatna hrang hrang avanga rilru natna nei, beisei tur leh innghahna tur pawh nei lova inhria, mahni nunna hial la duh leh, thihna lam pan mek - mi tam tak chhanchhuah ngai an awm avangin he thupui hi kan hmang a ni.

Harsatna hrang hrang kan sawi tak, tuartute tan hian Kohhran mipui, KTP, KNP, KPP te hian tih theih kan nei em le? 

Nei tehreng mai! Hengho tanpui a, an sal tanna lak ata hruaichhuak tur hian tih theih tam tak kan nei a ni tih hi kan hriat thar leh a tul takzet a ni. Kan Pathianthu chhiar tak, Roreltute 6:12 thu hi Lalpa vantirhkoh leh Gideon-a inbiakna thu a ni a. Heng hunlai hian Israel fate chuan Pathian duh loh zawng an tih avangin kum 7 lai Midian-ho tihretheihna hnuaiah Lalpa’n a kuntir a, an ran rualte an laksak a, an thlai tharte an tihchhiatsak a, chutiang chuan hrehawm takin Lalpa’n Isarael fate chu tawrhtirin a thunun a ni.

Amaherawhchu, Lalpa’n a mite tawrhna leh hrehawmna chu a hre reng a, Midian-ho hnuaichhiahna lak ata chu chhanchhuah a duh ta a. Chu mawhphurhna chu Ophra khuaa mi, Gideon-a kovah Lalpa’n a nghat ta a, a vantirhkoh hmangin a va hriattir ta a ni.

Vantirhkoh chuan buh vaw mektu, Midian-ho hnuaichhiah leh tihretheih avanga taksa chau tak mai, dawldang em em Gideon-a hnenah, “ He i chakna hian kal la, Israel-ho hi Midian-ho lak ata chhandam ang che, ka tir che a ni lawm ni?” tiin thu a va thlen ta a, nimahsela Gideon-a erawh chuan, “Aw Lalpa, engtin nge Israel-ho hi kei tehlul hian ka chhandam ang? Manasea thlahte zingah hnam rethei ber ka ni a, ka pa chhungte zingah ka te ber si a” tiin insit tak chungin a chhang a. Nimahsela hmangaihtu Pathian chuan, “Gideon, i hnenah ka awm zel dawn alawm, tichuan, Midian-ho chu pakhat ang maiin i hneh vek mai ang,” a ti ta a.


3. Pathian hna thawk tur hian eng rilru nge kan put ve le?

Keini kohhran mipuite hi Gideon-a darthlalangah hian han inen ta ila. Lalpan min hman a duh mek lai leh, kan thalaipui; nu leh pa tam tak - Lalpa hnaih nachang hre reng reng lo te chhanchhuak tura Lalpa’n min koh mek lai hian, engtin nge chu kohna chu kan lo chhan ve thin le?

KTP member atan Lalpa’n min ko va; mahse, keini chuan - keichu ka tling lo, kan chhungkua kan harsa si a, incheina tha pawh ka nei ve si lova, ti kan awm em? Keichu ka zakzum em mai, ka naupang bik lutuk a, ka senior tawh bik em mai kan lo ti em? Kan hnathawk kan bang tlai thin si a, emaw eizawng mi tan chuan a active ve tak tak theih loh alawm, te kan lo ti em le?

KTP, KNP, KPP, KHP hruaitu ni a, Lalpa hman duh thalaite, nu leh pa, naupangte kaihruai turin Lalpa’n min kova, tih peih chin leh rawngbawlna tur chin ramri kan lo inkham em? Kan inenlet theuh ava tul tak em!

Lalpa’n min kohnaah chhuanlam tam tak kan siam lai hian, ani erawh chuan heti hian min ti ve ta thung a nih chu mawle. “Nang mi chak huaisen, he i phatna zawng zawng atang hian ka chhanhim ang che, hlau suh la, ringhlel hek suh la, i hnenah ka awm zel dawn alawm,” tiin.

 

4. Gideona’n ral a bei:

Tichuan le, Gideona chhuanlam zawng zawng chu Lalpa’n a pawmsak tak miau loh avang leh a kianga awm zel tura a intiam avang chuan Israel fate chhanchhuak a, anmahni awpbettu ral chu bei turin a inbuatsaih ta a. Tin, Lalpa thu a hnenah a lo thleng a, “I pa bawngpa pahnih kum sarih mi chu la la, i pa neih baala maicham chu tichim la, a bula asera hi kit rawh. He kulh chhungah hian kawng zawng neiin Lalpa i Pathian tan maicham siam la, bawngpa pahnih chu la la, asera i kih tur thing hmangin halral thilhlanah hlan rawh,” a ti a. (Asera/aseri chu Kanan mite pathian nu, buh leh bala malsawmna thlentu leh chi thlahna kawnga malsawmna petu niin an ngai a, baala kawppui niin an ngai a ni). Chutichuan Gideona chuan a pa duhlai baala maicham chu a tichhe vek a, a bula asera chu a kit ta bawk a, Pathian thu angin huaisen takin ke a pen ta a ni.

Keiniho pawh hi tling lo hle mah ila, Lalpa’n a ram tana do tur hian min hmang duh miau si a, a ram rawngbawl hna chu kan kovah a nghah tak tho tho si chuan, kan tlin lohna leh fel lohnate chu hmu lian tawh lova, Lalpa chakna chu rinchhana ral kan do ve a hun ta a ni.

Amaherawhchu, hei hi hre reng ila. Gideona’n ral a beih tak tak hmaa anmahnia sual awm, baala maichamte tichim a, asera te a kih hmasak vek phawt ang khan, keini pawhin ral beia kan chhuah tak tak hma hian keimahnia sual awm; chapona sual te, tha intih vena sual te, duhamna sual te, midangte aia tawngsang bik leh hre bik nia inngaihna sual te, mahni inhmuh lenna tlang atanga midang hmuh khawrona sual zawng zawng te hi kan kih a, kan halral vek phawt loh chuan ral hi kan bei tak tak thei dawn lo a ni. Chuvangin rawngbawlna nung tak leh member hlate pawhin kan kianga rawn tel ve an chak theihna tura rawngbawlna nei thei tur chuan keimahnia sual awm zawng zawng te kan tihchhiat a, kan halral hmasak vek hi a ngai a ni.

 

5. Engtin nge thi mai tur kan vela mite chu kan chhanchhuah ang?

a) Hmangaihna leh ngilneihna hmangin:

Kan Pathian thu-ah hmangaihna, ngilneihna chu tanpui ngai, mahni intanpui thei si lo te chunga lantir tur a nihzia kan hmu a. A chhungkua inthlahchhawng zel tur chuan Abrahama chuan Bethuela tanpuina a mamawh a, a ruang Kanaan rama pu lut tur chuan Jakoba chuan Josefa tanpuina a mamawh. Tin, roluahtu a neih theih nan Naomi chuan Ruthi tanpuina a mamawh bawk a ni. Chutiang bawkin tunlaiah pawh tanpui ngai em em te chungah hian hmangaihna leh ngilneihnaa dawmkan hi kan tih makmawh a ni. 

            b) Beiseina thar nei leh thei tura tanpui:

Kan sawi tak ang khan kan tunlai khawvelah beiseina reng reng nei tawh lo, mal ngawih ngawiha inhria, pan tur leh belh tur pawh nei lova inhria mi tam tak an awm a ni tih hi hria ila. Hmusita endawng mai lovin, a kawmhlimtu leh tanpuitu ni zawk ila; beisei tur i la nei a ni tia kan fuih a, kan tawngtai pui mawlh mawlh hi a tul hle bawk a ni.

            c) Pathian thlarau hruaia an awm theih nan tawngtaipuia thutak hrilh:

Mi tam tak kan chhehvela mite hi Pathian thlarau hruaia awm lo tam tak an awm a ni. Pathian hre chiangtu chuan a fak lo thei lo thin. Pathian thutak an lo hriat nan leh Pathian thlarau hruaia an lo awm ngei theih nan, thutak kan hrilha kan tawngtaipui mawlh mawlh hi a ngai a ni.

Aw le, kohhranho te, ka thalaipui te leh nu leh pa te ka chah duh ber che u chu - Kan bul maiah Sualna avanga Pathian hnaih thei tawh lo te, ruihhloin a tihbuai te, retheihna leh harsatna hrang hrang avanga rilru dam lo mi beidawng te, thihna lam pana liam mek tam tak an awm. Lalpa’n anniho chhanchhuak tur hian min kova, huaisen takin thihna ata nunnaa hruai turin i bei sauh sauh ang u.

Lalpa’n a thu malsawm rawh se. Amen.