Nangni thawkrim leh phurrit phur zawng zawngte u, ka hnenah lo kal ula, keiman ka chawlhtir ang che u (Matthaia 11:28) 

Ka nghawngkawl chu a nuama, ka phur pawh a zang a ni. (Matthaia 11:30)

Thlamuanna ka hnuchhiah a che u; keima thlamuanna ka pe a che u, khawvelin a pek angina ka pek loh che u hi, in thinlung mangang suh se, hlauh pawh hlau suh se. (Johana 14:27)

 

Hahchawlhna, thlamuanna, engthawlna tih te hi danglam deuh mah se; thil thuhmun a nih chiah loh pawhin, inhnaih tak an ni a, thliarhran emaw, sawihran emaw a tul hran lo, kan sawi pawlh vek dawn a ni. Mi, a thlamuan chuan a hahdam a, hah chawl a ni, a eng a thawl bawk.

            Corona Virus avanga khawvel a mangan em em a, a thlaphan lai khan, vaccine siam tumin Scientist te an buai em em a,  "Enga ti nge?" tiin i ngaihtuah ve ngai em? Thlamuantu, hahchawlhna an zawng a ni.

            Evi leh Adama atang khan he hahchawlhna, thlamuanna hi an lo dap nasa tawh a, mihring ziaah hian a bet tlat tawh a lo ni. Suala an tluk rual chiah khan hahchawlhna, thlamuanna an dap nghal a, Pathian hnen atanga an bihruk khan hahchawlin an inring a, an saruak zahmawh khuh nana thuamhnaw an insiam khan, hahchawlhna bawk hi an zawn chu a ni. Eden huan atanga anchhe dawng nia hnawhchhuah an nih a, chala thlan tui luang zawih zawiha chaw an ei khan, hahchawlhna hi an mamawh em em a, an zawng reng ta mai a ni. Khata tang daih tawh khan Mihring hian, hahchawlhna/ thlamuanna hi a zawng reng mai a, a mamawh ber pawh a lo ni ta a nih hi.

            Khawvel ram ropui leh chakte pawh hian, vawiin thleng hian an la zawng reng mai! Hmanni lawka USA inthlanpuiah khan, Democrats leh Republican Party te chuan chak zawk nih inchuhin, thapui thawhin an inbei a, tawpin tai a nei dawn na nge, tih tur khawpin an la kal zel a nih hi. Hahchawlhna an zawng a ni.

            South China Sea-ah chuan lawngrual ropui leh chak tak tak, ralthuam famkima inthuamte chu an inep khup mai a, chungnung zawk nih an duh a, chutah chuan chawlhna a awm an ring a, an zawng a ni.

            Khawvelah Super Power awmchhun nia ngaih, USA chu China chuan a ngai thei vak lo! A chunga USA a awm chhung chuan a chawl hahdam thei lova, a thla a muang thei lo. USA lah chuan, China thiltih theihna lo pung zel leh a hauhsakna sang zel chu a hmuh hmaih hauh lo, a thla a muang thei bik lova, a hahchawl thei lo! Hahchawlhna chu a la zawng zel dawn a nih hi! Politiciante leh ram hruaitu, hmathlir ropui tak tak neite pawhin theihtawp chhuaha an beihna zawng zawng hi hahchawlhna an zawn vang a ni a, an thawhrimna zawng zawng pawh hi thlamuanna, chawlhna an duh vang a ni.

            Kan thenawm lawk, Myanmar-ah pawh sipai rorelna duh lovin kawng an zawh a, an lungawi lohna chuan a vawrtawp a thleng mek a, mipui an hahchawl thei lova, an thla lah a muang hek lo. Sipai sorkar pawh chu thuneihna an la ta cheng a, mipui khi zawng zawng leh, khawvel ram tam zawkin an dem huai huai lai hian, an hahchawl bik hauh chuang lo. Kan ram ngeiah pawh hian chu chu a danglam chuang lo; lalna, thuneihna, sum leh pai, in leh lo, khawsak sang zawk, rorelna fel, retheihna um bo, ruihhlo leh hmeichhiat mipatna, engkim mai lo thleng zut zut mai hi a chhan ber nia lang chu, kan hahchawl lo, kan thla a muang lo, zawn kan la nei tlat a nih hi! Chhungkuaah leh khawtlangah pawh a danglam chuang lo. Kan tu leh fate, thil tha tinreng kan duhsak a, thiamna finna an chan ve theih nan, neih zawng zawng piah lam pawh kan inseng huam a, hei hian chiang taka a tarlan chu hahchawlhna bawk hi a ni lawm ni.

            Nula tlangval te pawhin kan hmangaih ber, kawppui atana kan duh ber kan dap a, chhungkaw dinpui tur kan melh mek lai hian, kan zawn ber chu, hahchawlhna/thlamuanna tho hi a lo ni. Eden atanga mihring hrivei, dam thei reng reng tawh lo niin a lang.

            A nih leh, tu chuan nge, chuti taka kan zawn huai huai, kan buaina ber chu hlawhchhuak ta le? Ram ropui leh thiltithei, Super Power kan tih te, mi hausa tawntaw te, hmeltha hmingthang te, mi hlawhtling kan tih te, rorelna fawng vuantu te, tu ber hi nge, hahchawla, thlamuanna chu zawng hmu tawh le? Sawi tur a va vang si em! A chhana tawi te, dik bawk si chu tumahin an la hmu lo, tih hi niin i hre ve em? An hmuh kan ring em?

            He khawvelah hian awm ni se chuan, tu emaw ber hi chuan a hmu tawh ngei ang le. Mahse, thil chiang tak lo lang ta chu, thil awm lo an zawng a, an hmu lova, an hmu dawn bawk lo, tih hi a ni. Hei ngei mai hi, kan Lal Isua kha chuan a lo hre chiang nasa mai a, hahchawlhna neitu a nihzia chiang takin a sawi a ni. Amaha chawlte chu an hah a dam a, an thla a muang a ni, tih hi vawiin a ringtute hian kan hre chiang hle tur a ni ang.  Khawvelin nasa taka a  zawna a hmuh lohna hmuna thlamuanna leh chawlhna la zawng tlat ringtu kan ni em, tih hi kan infiah a va tul em! Kan zawn phak chin lah chu a la zim em em leh nghal. (Tirhkoh Paula nun hi en lawk teh ang.Phil 4:11-13 chhiar ila.)

            Min tichaktuah chuan engkim ka ti thei, a tih hian, tunge a tichaktu chu, “Ka hnenah lo kal ula, keiman ka chawlhtir ang che u” titu tho kha a ni. Rawngbawltu, Lal Isua hnungzuitu rinawm a nih vang ngawt hian harsatna chuan a kiansan bik hauh lo. Mahse, tu nghawngkawl nge a bah? Lal Isua nghawngkawl ngei chu a bat a, a phur chu zang ti takin leh hahdam takin a phur zel mai zawk a ni.

            He khawvela kan awm chhung hian, harsatna, buaina, lungngaihna thihna hial pawh kan chungah a lo la thleng ang. Lal Isua tel lova tuar ngam, Lal Isua hnen thlen duh hauh lo khawpa huaisen ringtu hi an awm ngai ang em aw, tiin a ngaihtuah theih. A nachang hriat lohna avang tein emaw, sual avang tein emaw, eng vang pawhin lo ni rawh se, Ani chu a pangngai renga a danglam ve ngai lo. Kan phurrit min chhawk a, hahchawlhna min pe a, thlamuantu min hnutchhiah tur hian a awm reng a, a hnai reng a ni.  A hnen i thlen ang u, amahah chuan kan mamawh chu a awm thu amah ngeiin a sawi a nih hi.

            Chu thlamuanna chu, “Keima Thlamuanna” tiin a sawi zet a, “Khawvelin a pek angin ka pek loh che u hi” a han tih zet hnuah, “In thinlung mangang suh se, Hlauh pawh hlau suh se” a ti leh ngat a ni. Khawvel pek thin Thlamuanna leh Hahchawlhna hi a rin tlak loh a, innghahna tlak a ni lo tih min hrilh bawk a ni. Mihring hi a thlamuang lova, thlamuantu, hahchawlhna a mamawh a, a zawng ruai a ni tih hi a hre chiang em em a, a mangang thin a, a hlau thin, tih pawh hi a hre chiang em em a ni.

Kohhranhote hian chawlhna dang kan mamawh lova, thlamuanna dang kan mamawh hek lova; Amah, kan Lal Isua ngei hi kan hahchawlhna, kan thlamuanna a lo nih zel theih nan, Lalpan a thu malsawm rawh se.  

Amen.