Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh ti famkimtu lam chu enin, kan hma a intlansiakna tur awmah chuan chhel takin i tlan zel ang u. (Hebrai 12:1-2)

Khawvelah hian intihsiakna hrang hrang a awm a, chutah chuan mi tam tak kan intlansiak thin a ni. Kan intlansiakna erawh chu a inang kher lovang. Thenkhat khawvel thiamna leh finna lamah te, sum leh paiah te, khawvel hlimna leh nawmsakna lamah te kan tlan ve bawk a. Mi thenkhat khawvel infiamna lamah kan tlan ve bawk a. Chutiang chuan kawng hrang hrangin kan theihna, thiamna leh tuina lamah kan intlansiak hlawm a ni. Heng zawng zawng hi khawvela kan awm chhung chuan kan um tur leh, kan intlansiakna tur pawh a ni ta ve ang. Mahse, heng zawng zawng hian hlimna leh lawmna, lungawina tak tak erawh chu a thlen si lo.

Keini ringtute erawh chuan Pathian thu hriatna lamah leh thutak nunpuina lamah intlansiak zawk ang u. Chutah chuan hlimna, lawman leh lungawina chu a awm zawk a ni. Thu kan hriatfiah theihna tur leh thutak kan nunpui theina tur chuan ISUA ke bula kan awm tam erawh a ngai a ni (Luka 10:39-42).


Pathian thu kan hriat tam theihna tura pawimawh thenkhatte:

Bible chhiar tam : 

    DL Moody chuan ti hian a sawi a, “Kan tawngtai hian Pathian kan bia a, Bible kan chhiar hian Pathianin min be ve thung” a ti a ni. Pathian thu hi thawnthu chhiara chhiar liam puat mai tur a ni lo va, a thu kan hriat fiah theihna turin thlarau thianghlim puihna dil chungin kan chhiar thin tur a ni. Chhiar lamah harsatna nei kan nih chuan i smartphone atang khan Bible Apps atangin a ngaihthlak theih a ni. (Phone Play store atangin You version Bible tih kha lo download rawh)

Inkhawm tam : 

    Inkhawmnaah hian thu ho mai mai leh thu tha lo an sawi ngai lo va, Pathian thute ngaithlain, Pathian kan fak thin a ni. A tam thei ang berin lo inkhawm la, i inchhir ngai lo vang.

Sunday School kal : 

    Mi thenkhat chuan inkhawm kan ngai pawimawh em em a; mahse, Sunday School erawh chu kan ngai pawimawh lem lo a ni. Sunday School-ah hian Pathian thua kan hriatthiam lohte leh, hriatfiah lohte chu awmze nei leh felfai takin kan zir thin avangin, inkhawm kan ngaih pawimawh ang hian Sunday School pawh hi i ngai pawimawh ve ang u. Tin, Sunday School hi kaikim emaw examnaa honour kai emawh hi a pawimawh ber lo va, kan nun atana hlawkna kha a pawimawh zawk chu a ni.

Pathian thu ngaithlak tam : 

    Khawvel a changkang tawh em em a, biak inah chauh lo pawh social media-ah te hian Pathianin a mi hman em emte thu sawi tam tak ngaithlak tur a awm a ni. Tunlai mi thenkhat chuan Pathian thu ai chuan pasaltha thawnthu leh thawnthu dangte kan ngaithla tam zawk a ni. An bengte chu thutak lamah an chhungawng anga, thawnthu lam panin an peng tawh ang (II Tomothea 4:4) tiin Pathian thuah kan hmu bawk a ni. Heng thawnthute ai hian Pathian thu ngaithla tam ila, kan bengah hian Pathian thu hi lut tam se la kan tangkaipui zawk ngei ang.

Pathian fakna hla ngaithlak tam : 

    Mihringin kan benga kan hriat tam lam apiang hi kan rilruah a awm thin a. Mi thenkhat chuan thu hi hla a ni a, hla hi thu a ni, an lo ti bawk a ni. Love song, tunlai chanchin leh chanchin dangte i ngaihthlak tam chuan chu lamah chuan i rilru a hruai ang che.

Pathian thu hrilhfiahna chhiar tam : 

    Bible-ah hian thu har tam tak kan hriatthiam loh leh hriatchian loh tam tak a awm ang. Chung angte hrefiah tur chuan mi thiam zawkte thu ziak leh hrilhfiahnate hi kan chhiar tam a ngai a ni.

Pathian thu ngaihsak : 

    Tunlai kohhran mite/ringtute hian duh aiin Pathian thu hi kan ngaihsak tawk tawh lo niin a lang. Kan ngaihsak zawng lamah chuan hunte pawh kan pe thei thin a ni. Pathian thu chuan, ”I ro awmna apiangah i rilru pawh a awm” tiin min hrilh a ni.

Kan ngaihsak leh kan buaipui tamna lamah hian kan rilrute pawh kan pe thin a ni. Chuvangin, Pathian thu hi i ngaihsak zual sauh ang u.

A chunga kan sawi zawng zawng hi hriat ringawt a tawk lo va, nunpui hi a pawimawh a ni. Kohhran member zawng zawngte u, kan hun kal tawh chu eng ang pawh chu nisela, tun atang erawh chuan Pathian thu hi ngaihsak ila, zir ila, zawma nunpui lamah hian intlansiak thar leh ang u.

 Pathianin a thu malsawm rawh se.