Kan hriat angin Mara (Lakher) rama chanchin tha rawn thlentute chu Lakher Pioneer Mission an ni a. An missionary hmasa berte nupa, Rev. RA Lorrain leh a nupui Maude Louise Lorrain  ten mara ram hi Sept 26, 1907-ah an lo thleng a. Tichuan, he ramah hian chanchin tha chu hrilin Kohhran a lo ding ta a ni. Mara ram kohhran hming hmasa ber chu kum 1959 khan kan missionary ten Lakher Independent Evangelical Church tiin an phuah a, hemi hnu hian kum 1967-ah Lakher tih chu Mara tiha thlak a lo ni. Kum 1976 khan MIEC tih chu Independent Church of Maraland (ICM) tiha thlak a ni leh a, a tir atanga Kohhran Hqtrs chu kan missionary ten an lo buatsaih Saikao hi a ni.

Mizoram UT hnuah Mara ram pawhin hma a lo sawn ve zel a, Lunglei atanga Tuipang pawh BRTF Road a kaltlang ta a. Hetih lai hian Mara Kohhran Hqtrs Saikao erawh chu kawngpui hian a paltlang ve lo a, Kohhran Hqtrs-a Committee tura kal te pawh a harsa hle! PL Region 1953 atanga Siaha hi Regional Council Hqtrs a lo ni tawh thin a, 1972-a Mizoram UT a lo nih khan District Hqtrs a lo ni zui ta a ni. Chutichuan, Mara ram mipui leh kohhran te rilruah kawng hrang hranga kohhrante hmasawn zawk nan kohhran Hqtrs pawh Saikao atanga Siahaa sawn a tulna mite rilruah a lo lut tan a. Kohhran inrelbawlna a fel zawk theih nan leh hmasawn zawk theih nan Dist Hqtrs-a kohhran Hqtrs dah chu Mara kohhran ICM tan chuan tihmakmawh a lo ni ta hial a ni. Chutichuan, 1988 – 1989-ah Kohhran inrelbawlna enfiah tur leh rawtna tha zawk Assembly-a pu lut turin Planning Commission din a lo ni ta a ni. Planning Commission chuan hetiang hian ruahmanna a lo siam a-

            Saikao hi kan missionary ten a tirte atanga station-a an lo neih  a nih avangin mission station ni se la, Saiha hi Administrative Station ni rawh se tiin kum 1989, New Saiha Assembly-ah chu rawtna chu put luh a lo ni ta a. Chutichuan, Assembly rorelna chuan Planning Commission rawtna chu lawm takin a lo pawm ta a ni. ICM Administrative Station Siahaa dah tura Assembly-in thu a lo pass hian Mara ram mi thenkhat leh, Serkawr khua bikte chuan Hqtrs sawn tluka ngaiin, a hrana kal an rel thlu ta a. He Planning Commission vek hian kohhran hming ICM tih chu Evangelical Church of Maraland tiin rawtna a lo siam bawk a. Chu chu Assembly hian a pawmpui bawk a ni. Chutichuan, Mara kohhran chu an hming hmasa ICM kalsanin ECM tih  a lo ni ta a. Hetih vek lai hian Planning Commission rawtna pawm ve thei lo mi thenkhatte chuan ECM kohhrana awm ve duh lovin ICM-ah an awm zui ta a, hei hi Mara ram kohhran inthenna bul a lo ni ta ni. Hun a lo kal deuh a, 1994 khan ICM chuan an hming chu Congregational Church of Maraland tiin an lo thlak ve bawk a. Tichuan Mara Kohhran chu 1989 atangin hmun hnihah a lo inthen ta a; amaherawhchu, inpumkhatna kawng dap zel chung leh beisei zel chunga kohhran pahnihte hi kal an nih avangin ram emaw, biak in emaw inchuh a awm ve ta lo va, tha takin ram leh biak in te pawh an lo inkian thei a ni.

            Chutichuan, kohhran pahnihte Assembly hnuaia inpumkhat leh tur hian ICM leh ECM hruaitute chu vawi tam tak an lo thukhawm thin a; mahse, inpumkhatna chu a thleng thei tlat lo va. Mara ram kohhrante inpumkhat lehna chu thil pawimawh tak a nih avangin 2006 – 2007-ah khan inpumkhat leh tura inbiakna neih a ni a, hetah hian kohhran inpumkhatna atana Congregational Evangelical Church of Maraland ni se, Hqtrs erawh Siaha ni se la, tiin rawtna a awm a – mahse hei hi a puitling ta lo a ni. Kum 2017-2018-ah inpumkhat tura inbiak chhunzawm leh a ni a, hetah pawh hian Congregational Evangelical Church of Maraland tia rawtna leh Hqtrs chu Siaha ni rawh se, tia rawtna a awm bawk a – mahse hei pawh hi a puilting leh ta lo a ni. CCI(M) hian Kohhran hming hi pawlh a nih chuan Hqtr chu Siahaa dah pawh hi an lungawina niin a lang a, mahse hei pawh hi a puitling leh ta lo a ni.

            Mara rama Lakher Pioneer Mission-in a din kohhran pahnihte inthen ta ECM leh CCI(M) chuan inpumkhatna hi an dap chhunzawm reng a. Kum 2021-2022-a kohhran pahnihte inpumkhat leh tura thukhawm chuan inpumkhat leh theih nan rawtna an siam ta a. He rawtnaah hian Assembly Hqtrs Office chu Siaha-ah a awm ang a, Saikoa-ah Mission Administration a awm bawk ang a, Siaha chu General Administration hmun a ni ang. He rawtna hi 2024 Assembly ve ve-ina a pawm hnuin lawm takin inpumkhat dan tur relho a ni a; chutichuan, Special Joint Assembly koha he Assembly-a inpumkhatna atana ziahfel ngai leh thil tul dang zawng zawngte chu ti turin thu an lo rel ta a. Chutichuan, Special Joint Assembly  chu New Siaha Local Church-ah May 24- 26-ah neih ni se tih an rel thlu ta a  ni.

Chutiang chuan Mara Lakher  Pioneer Mission din Mara kohhran hmun hniha hun rei tak chhung inthen chu May 24, 2024 tlai lam dar 6:30 pm ah inremna thuthlung ziakin Assembly pakhat, Evangelical Church of Maraland-ah an lo inpumkhat ta  a ni.