"Pathian hmangaihtu, ama ruat anga a kohte tân chuan, an thatna turin engkimin a thawhsak thîn tih kan hria" ROM 8:28

 

            Kan ni tin nunah hian chhhuk chho a tam a, kan mimal nunah hlimna lo thleng a awm thin a, beidawn em em changte pawh a awm ve bawk. Harsatna a lo thlen changin, “Pathianin kan tana tha turin min thawhsak ang,” kan ti mai thin a, a dikna chin pawh a awm ngei ang. He chang lar tak hi khawhar chhungkua leh harsatna tawkte hnem nan kan hmang fo thin, thenkhat chuan thlamuanna kan hmuh phah ve bawk thin.

            Han zir chiang ta ila:-   

        “Pathian hmangaihtu” tih chuan Pathian nena relationship tha tak nei, Pathian chu engkima dah pawimawh hmasatu, a thute awiha a zirtirnate pawh zawmtu tihna a ni awm e. Tin, kan hmangaihte chu an lawmna kan ngaihtuah hmasa ber thin.

            “Ama ruat anga a kohvate” tih chu Pathianin mihringte a siam chhan - amah fak leh a duhzawng tih - mi chutiang, Pathian duhzawng ti thintute tihna chu a ni.

            “An thatna turin engkimin a thawhsak hlawm thin” he lai tak hi chu kan chiang viauin a rinawm. Pathian remtihna leh remruatna lova thleng hi mihringte chungah pakhat mah a awm lo va, thil tha lo leh vanduainaa kan ruatte pawh hi a ropuina leh a malsawmna thlentirtu a ni. Rom khua mite hnena Tirhkoh Pawla’n he lehkha a thawn hian, Rom kohhranten nasa takin tihduhdahna leh harsatna an tawh lai a ni a, Pathiana rinna nghah tlat a, Pathian remruatna a ni tih pawm tur leh, Pathianin an tana tha turin hna a thawhsak dawn  a ni tih a hriat nawntir a ni.

            Josefa chanchin kan hre tawh theuh ang a, a pain a duhsak bik avangin a unauten itsikin salah an hralh a nih kha. A pa fapa duat tak tan chuan rilru a nain beidawn a va awl dawn tak em! Pathianin Josefa nunah hna a thawk mek a ni si a. Tichuan a tawi zawngin sawi ta ila, Potipharan a ina sala awm turin a lei a, engkimah a rinawm zel avangin Potiphara pawhin a inchhunga thuneituah a dah hial a. Chanvo tha a chan tak hnu pawhin Pathian a hlauhna leh a rinna a thlah lo. A bul tanna ngaihtuah chuan chutiang dinhmun sangah te chuan keini ni ve ta i la, enjoy a awl ve ngawtin a rinawm, ani erawh a pangngai reng a ni. Potiphara nupuiin dawta hekin lung inah khung leh a ni a, dinhmun sang tak atangin lung inah a sentence tur nghakin a awm a, beidawnna ruamah a thu a. Amaherawhchu, a rinna a nghing eih lo tih kan hria, mumang hrilhfiah theihna Pathianin a rawn pe a, chu thilpek hmang chuan Pathianin dinhmun sang takah a rawn hlang leh ta a ni tih kan hmu a ni.

            Aigupta treasury office-a hotu ber a nih pawhin rinawmna a  vawng reng a. Tam a lo tlak a, a u ten ei tur dila an lo pan lai khan, sala an hralh tak an unaupa kha a ni tih an hre lo va, ani erawh chuan a hre reng a, phuba lak ahnekin a ngaidam a nih kha. Hetah chiah hian Pathian thil tum, Pathianin Josefa nuna a thil buatsaih chu a lo lang ta chiah a ni.

            Kan chunga thil tha lo thlengte hi Pathianin thil thaa chantir chu a a thil tum zawk a ni thei reng a. Kan rilru tina em emtu, kan nun min tihaha tihrehawm thintu kan nei theuh ang. Kan rilru tihahtu hi hunlai azirin a inang lo thin hle a. Zirlai kan nihlai chuan exam-te kha kan rilru min kaptu leh kan nunphung tihrehawm em em thintu a ni a; mahse, exam te kha lo awm lo ta se la, tun dinhmun hi kan thleng thei hlawm ang em? Tleirawl kan lo ni a, kan chhass-te khan kan rilru an han tina thin kha chu kan khawvel hi a pik thin a ni tiru, chu chuan eng nge min zirtir? Mihringa innghat lova Pathiana innghah that zawk ziate kan hmu thei tawh awm e.

            Thiante nena intihthiam loh chan a lo awm palh pawha kan hriat reng tur chu Pathian remtihna lo chuan rilru natnate hi a thleng lo, Pathianin thil tum a nei a ni tih kan hriat a pawimawh hle. Kan thisen zawmpui, chhungkhat laina then tawh kan awm nual ka ring. Thihna hi chu he khawvela kan thil tawnte zinga thil rapthlak ber a ni hial awm e - a tawp, a final bik ngawih ngawih a ni. Heng hunah hian Pathian hnathawh a ni tih hi thil pawm harsa tak a ni. Amaherawhchu, Pathian chuan ama hmangaihtute tan chuan kan tana tha turin engkimah min thawhsak miau si a, amaha rinna nghat tlat turin min chah a, aman engkim a control vek a ni tih i hre thar leh ang u.