“Khawvel zawng zawngah kal ula, thilsiam zawng zawng hnenah chanchintha hi hril rawh u” tih hi kum zabi 19-20 chhung khan a lar hle a. Hemi avang hian keini ram kilkhawra mi pawhin chanchin tha hi kan lo dawn ve phah ti ila a sual tam lovang. Mahse, tun hnuah hian he thu hi a lar nep deuhin thu pawimawh dang hian a lan deuh em ni aw, tih theih a ni.

Khawvel zawng zawngah kal ula:

            Kristian tam tak hian khawvel zawng zawnga chanchin tha hril hi hlen ti tihah ngai deuh kan awm pawh a ni thei a. Mahse, Marka 16:15 thu-a Isua thupek hi vawiin thlengin a la ding reng a. “Khawvel zawng zawngah..” tih hi kan la hlen chhuak lo a ni. Tun hmain “Khawvel” tih hian ringlo mite an kawhtir deuh bik thin a. Mahse tunah chuan hrilhfiahtu hrang hrang ten “Khawvel” tih hi “HNAM” (ethnic) emaw mipui hlawm (Mt. 28:19) tia hrilhfiah a ni ta thin a. Joshua Project-in a tarlan dan chuan Khawvelah hian hnam hlawm 17446 vel an awm a, chung zinga hnam 7391 chuan Chanchin tha hi an la hre miah lo a ni.

Kan bulhnaia mi te hnenah:

            Hetih mek lai hian, “Khawvel zawng zawnga kal chhuah..” tih hian chanchin tha la hre ve miah lo hnam 7391 te chauh a huam tawh emaw a tih theih a. Mahse chutiang ngawt chu a ni bik tlat lo. Chuvangin hla taka mite chauh ni lovin kan bul hnaia mite hnenah pawh chanchin tha hi kan hrilh mawlh mawlh a hun tawh hle zawk a ni. Kan bul hnaiah hian thlaraubo tam tak an tei suau suau a, hremhmun lamtluang zawhin ni tin mai kan thalaite thlanmual lamah kan vuiliam a. Hengho chhanchhuah hi hna hmasaah kan neih hial a tha ber mai lo maw?

Kan bulhnaia hnamdang mite hnenah:

            Kan ram hauhsakna min tawmpui tur leh Sawrkar hna avangin hnamdang mi tam tak kan ramah an rawn khawsa a. Henghote hi Lalpa Beram huanga lo sengluh hi kan mawhphurhna a ni. Pathianin ram hla tak pana, sum tam tak kan senna tur min pumpelh tir a, thlaraubo kan hnenah min rawn hruai thlensak a ni tih zawngin ngai ila. Chuvangin kan awmdan, chetzia leh tawngkam chhuak atang rengin chanchin tha hriltu hnam kan ni tih kan lantir a tul a ni. Hmusit tak leh deusawh taka kan han be thin te, an thawh hlawhte kan pek that duh lo vel te, an dawrah Pawisa khawn kan ching thin te pawh hi an hnena chanchintha kan hrilna tur daltu a ni mai lawng maw. Kan inenfiah deuh chu a ngai a ni.

            Chuvangin Kohhranhote kan harh a hun ta hle mai! Theihpatawpa chanchin tha hril hna hi kan thawh a ngai. Hemi atan hian sum leh paite leh tawngtainate pawh nasa lehzuala kan thehchhuah a ngai ta. Vawiinah College Vaih Local-ah ram pum fang tur Ramthim bawm release a ni a. Heihi Kohhran ten sum kan tuakna satliah a ni lo tih i hria ang u. Dragon rapthlak tak mai kan dona atana kan ralthuam pakhat a ni ti zawgin ngai ila. Kan in leh lo a lo thlen hunah rilru i lo siam fel ang u. Ephesi 6:12 ah khan kan leido te hi mi satliah mai mai an ni bik lo. Hmelma hlauhawm tak kan hmachhawn mek a ni tih kan hmu a. Hawh u, Lalpa-ah chuan kan tha tichak ang u, kan hmelmapa kan do hneh ngei theih nan…..