He Bible chang hi tawi te nimahsela a pawimawh hle a ni. Keini ringtute chuan kan sawi ngun em em a ni a. Ringtu nun min chelh dingtu leh Kohhran tinghettu Bible thu kan Lal Isua’n kan ngaih pawimawh em em tura min zirtir a ni a. Nimahsela a taka kan nunpui a, kan neih hleih theih si loh a ni ti ila a sual tam awm lo ve. 

Pathian ram hi mimal, Kohhran, chhungkua, khawtlang leh ramah a thlen loh chuan, nun hian awmzia tak tak a nei lovin, rorelna leh thuneihnate leh nunhonaah hian awmze nei takin a kal tak tak theih loh a ni. He thu hi tawng dangah chuan, “Thy Kindom Come” tih a ni a, i ram lo thleng rawh se tih a ni.

Kan nun engkimah lo lal ber ang che tihna tluk a nih tak chu. Amaherawhchu, a taka kan nunpui a, kan hman loh avangin ram rorelna lam duhtawk lo va, khawtlang kan buai a, chhungkaw innghirnghona thlengin kan mimal nun a lo chau fo thin a ni.

Hetiang harsatna zawng zawng a reh a, kan hneh theihna tur chu Pathian lalna ram - ramah, khawtlang, chhungkua leh mimalah a thlen phawt a ngai a ni. Matthaia 6:33 “A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia” tih a nih kha.

Tichuan kan Bible chang thlan Matthaia 6:10 thu hi kan Lal Isuan zirtirte hnena tawngtai dan tur a zirtirna a ni a; hetih hunlai hian Pharisaite hian tawngtaina hi an ngai pawimawhin an peih hle. Pharisaite chu mifel, insumthei em em te awmkhawm - an thil tih tawh reng reng chu mi fak leh chawimawi duhna thinlung puin, tlin tak leh fel taka ti thin an ni. Kawngpeng thuam lunlai mipui tawmna hmunah te pawh ring tak takin an tawngtai thin a. Chu chu Isua zirtirte hian an lo hmu fo thin a ni ngei ang. Isua hnenah zawhna siamin Lalpa kan tawngtaiin engtia tawngtai tur nge ni ang? Pharisaite anga tawngtai tur hi em ni ang tiin? Isua chuan, “Nangni chu in tawngtaiin Pharisaite leh mi verhvekte ang maiin kawng pengthuamahte tawngtai mai mai suh u, anni chu an tawngtai zawh rualin an lawman chu an hmu zo tawh a ni. Matthaia 6:5

Chumi awmzia chu pawn lam mawina mai ni lovin, chhungril lamah taknaah zawk Pathian ram a thleng tur zawk a lo ni. Pawla chuan Rom 14:7 “Lang thei lam ei leh in lam a ni lo, Felna te, Remna te, Thlarau Thianghlima lawmnate a ni zawk e. Tichuan, Pathian ram a thlennaah chuan inrem thei ngai lote pawh an inrem thin a, thlamuanna nei lote pawh an lo thlamuangin rorelna fel leh tha a lo awm thin a ni tih Isaia 11:6- 9-ah kan hmu a ni.

Pathian ram chu engtin nge a lo thlen theih ang?

 1. Sual simte hnenah a thleng:

Jona 3:6-8 Ninevi khawpui hi khawpui ropui tak chapona leh sualna chi hrang hrangin bu a khuarna hmunpui a ni a, an nun dan leh khawsa zia chuan Pathian pawi a khawih pha hial a, chumite hnenah chuan Pathianin tlangau turin zawlnei Jona a tir a. Tichuan an lal leh an ran te nen lam simin sai-ip puan an sin a, Pathian ram chu a thleng ta a. Keini kan ram ngeiah pawh hian kan bawhchhiatna leh sualna zawng zawng te kan simna turin tlangautute kan hmu mawlh mawlh a ni. Ninevi khawpui anga kan sim chuan Pathian ram a lo thleng anga, kan ram, khawtlang, kohhran, chhungkua leh mimalte kan dam ngei ang.

 2. Lalpa hmaa tlawmte hnenah Pathian ram a thleng:

2 Chro 7:14, Phil 2;5-8 “Ka hming pu ka mite chuan inngaitlawma an tawngtaia mi zawna an awmdan sualte an hawisan chuan van atangin ka lo ngaithla ang a, an sualte kan ngaidam anga, an ram chu ka tidam leh ang. Eng angin kan lo sualin kan lo bawhchhe tawh a ni ang; nimah sela, chung kan sualna zawng zawngte atang chuan inngaitlawm a, sima Lalpa kan auh chuan Pathian ram a lo thleng ang a, min tidam dawn a ni. Luka 19;8-10 a kan hmuh – Zakaia chhiahkhawn hotu inngaihtlawmna avangin Pathian ram amaha a thleng ang khan, keini pawh inngaitlawm taka Pathian hnenah tlu lut mai tur kan ni.

3. Lalpa Isua sawmtute hnenah Pathian ram a thleng thin:

Luka 24;13 Emau kawnga thiandun kalte kha beidawnna nen an hun an hmang a. Mahse anmahni lo pantu chu tu nge a nih pawh an hre lo! An mit tihvaihsak a nih avangin khua a tlai tawh si a, an hnenah cham ve mai turin an sawm a. Zanriah an ei dawnah an mit tihvarsakin an lo awm ta a, an zinga mi chu Nazareth Isua a ni tih an hre ta. An zinga Isua a tel ta chu an lawm em em a ni. Amah sawmtute hnenah Pathian ram a thleng thin. Hla siamtu chuan, “Sawmtute sawmna hnar ngai lo Lal Isua” a ti a. Kan hlim lai a ni emaw, kan lungngaih lai a ni emaw, eng lai pawhin Isua sawmtute ni ve ila, kan hnena thlen hi Lal Isua’n a chak a ni tih i hre thar leh ang u.

4. I thu ang zelin ka chungah thleng rawh se titute hnenah Pathian ram a thleng:

Luka 1;30-38. Helai Bible changah hian Mari leh Vantirhkoh Gabriela inbiakna kan hmu a. Vantirhkohin ngai rawh i rai ang a, fapa i hring ang a, a hmingah Isua i sa ang, a tih khan, Mari chuan a pawm thei lo nasa mai! Mipa ka nei lova, engtin nge chu chu a nih theih ang, a ti a. Gabriela’n a hrilhfiah nek hnuah Mari a hmin ta a ni. Nimahsela, heta Mari chan tur hi a namai lo hle mai! A chhan chu pasal hual lai nei a ni a, Juda danah chuan pasal hual lai nei nau pai ta chu lunga denhlum tur a ni. Chung zawng zawng huam a, “Lalpa bawihnu ka ni, i thu ang zelin ka chungah thleng rawh se” a tih chiah khan Pathian ram amahah a thleng nghal a, mipa tel lovin Khawvel chhandamtu Lal Isua paitu leh hringtu mi ropui tak a lo ni ta a ni. Kan duh ang leh hlim zawng, kan hamthatna turah chuan, i thu ang zelin ni rawh se tih hi kan harsat vak lo a ni mai thei. Mahse, kan duh ang leh hamthatna tur ni lova, i thu ang zel in aw ni ang tih hi chu harsa kan ti hle ang.

Kan Lalpa Isuan tawngtai dan tur min zirtir hi sawirual a chham satliah mai ni lovin, khawi hmunah nge a thlen thin tih kan sawi tak atang tea ngaihtuah chungin thinlung chhungril ber atang hian i ram lo thleng rawh se, i ti tawh ang u. Tichuan, kan ram, kan hnam, khawtlang, chhungkua, Kohhran leh mimal nun hi a lo dam thei dawn a ni.

Lalpa’n a thu malsawm rawh se.